காந்திஜியையும் தொட்ட இறை இரக்கம்

காந்திஜியையும் தொட்ட இறை இரக்கம்

இந்தியா என்றால் காந்தி. காந்தி என்றால் இந்தியா. இந்தியாவும், காந்தியும் நாணயத்தின் இருபக்கங்கள். ஆகஸ்ட் 15 அன்று நாம் கொண்டாடும் பாரதத் திருநாட்டின் விடுதலை நாள் விழாவில் மகாத்மா காந்தியிடம் நாம் காணும் இறை இரக்கச் செயல்பாட்டினை சிந்தித்துப் பார்ப்பது மிகவும் இனிய காரியமாகும்.

பிரதமர் நரேந்திர மோடியின் இரயில் பயணம்: 

நிகழாண்டு ஜீலை 07 முதல் 11 வரை பாரதப் பிரதமர் மொசாம்பிக், தென் ஆப்பிரிக்கா, டன்சானியா மற்றும் கென்யா போன்ற நாடுகளில் அரசு முறைப் பயணம் மேற்கொண்டார். ஜீலை 09 அன்று பீட்டர்மாரிட்ஸ் ‡ பார்க்கிலிருந்து ஜோகன்ஸ்பர்க் வரை வரலாற்றுச் சிறப்பு மிக்க இரயில் பயணம் மேற்கொண்டார். அது மோகன்தாஸ் கரம்சந்த் காந்தி அவர்கள் 1893ஆம் ஆண்டு முதல் வகுப்பில் பயணிக்கக் கூடிய கட்டணச் சீட்டுப் பெற்றிருந்தாலும் இனவெறியின் காரணமாக ஓடும் இரயிலிலிருந்து வெள்ளையர்களால் கீழே தள்ளி விடப்பட்ட நிகழ்வை நினைவு கூர்ந்தது.

இந்த மனிதாபிமானமற்ற நிறவெறிச் செயல்பாடுதான் உலக வரலாற்றையே புரட்டிப் போடும் புதிய வாழ்க்கைத் தத்துவம் மலரக் காரணமாக அமைந்தது. இவரைப் பின்பற்றி 30 ஆண்டு இறைக் கொடுமைகள் அனுபவித்த நெல்சன் மண்டேலா அவர்கள் 1999ஆம் ஆண்டு தென் ஆப்பிரிக்காவின் குடியரசுத் தலைவராகப் பதவியேற்க காரணமாக அமைந்தது. பிறரைத் துன்புறுத்தாது, மனவலிமையோடு எதேச்சதிகாரமாகச் செயல்பட்ட பிரிட்டிஷாரின் ஆட்சியினைத் தூக்கி எறிந்த வாழ்க்கைத் தத்துவம். அதுவே அகிம்சை என்னும் வாழ்க்கை நெறி.

கிறிஸ்துவைப் பற்றிய காந்திஜியின் புரிதல்:

காந்தியும், கிறிஸ்தவமும் (றூழிஐdஜுஷ் ழிஐd ளீஜுrஷ்விமிஷ்ழிஐஷ்மிதீ) என்னும் புத்தகம் இராபர்ட் (யூலிணுerமி சியியிவிணுerஆ) எல்ஸ்பர்க் என்பவரால் பதிப்பிக்கப் பெற்றது. இந்த நூலில் கீழ்க்காணும் கருத்துக்கள் பதிவு செய்யப்பட்டுள்ளன.

1. காந்தி பைபிள் முழுவதையும் படித்தறிந்தவர்.

2. பழைய ஏற்பாட்டு நூல்களைப் புரிந்து கொள்ள முடியவில்லை. அதிலும் எண்ணிக்கை நூலினை அவர் விரும்பவே இல்லை.

3.  புதிய ஏற்பாட்டின் நூல்களை நன்கு புரிந்து கொண்டார்.

4. மத்தேயு நற்செய்தி பிரிவு 5இல் காணப்படும் மலைப்பொழிவு அவரின் மனம் கவர்ந்த பகுதியாகும். இவண் காணப்படும் கண்ணுக்குக் கண், பல்லுக்குப் பல் என்ற பழிவாங்கும் நிலை மாறி வலக்கன்னத்தில் அறைபவருக்கு மறுகன்னத்தையும் காட்டு (மத் 5 : 38 - 42) என்னும் அறிவுறுத்தல் காந்தியின் மனதில் மாற்றுச் சிந்தனையினை விதைத்தது. அகிம்சை, சத்தியாக்கிரகம், ஒத்துழையாமை போன்ற வாழ்வின் தத்துவங்களுக்கு இப்போதனையே அடித்தளமாய் அமைந்தது.

5. இதனை ஆழ்ந்து தியானித்த வேளையில் தான் ஏன் கிறிஸ்தவத்தினை தழுவக் கூடாது? என்ற கேள்வி தம்முள் உதயமானதாக தமது நண்பர் மில்லி போலக் என்பவரிடம் ஒருமுறை கூறியுள்ளார்.

6. மாற்கு 10 : 17 - 22 செல்வந்த வாலிபரோடு இயேசு நடத்திய உரையாடல். இதில் இயேசுவின் ஆளுமையும், உலகியல், பொருளியல் மற்றும் உளவியல் தெளிவும் நன்கு புலப்படுகிறது. செல்வத்தின் மீதுள்ள அதிகப் பற்றுதல் காரணமாக நிறைவாழ்வினைக் குறைவாக்கும் பாதையில் பயணிக்க ஆரம்பிக்கின்றார் இந்த வாலிபர்.

7. ஏழ்மைக் கோலம், அவமானத்தின் சிலுவை மரணம், சாத்வீகப் போக்கு, விளிம்பு நிலை மக்கள் மீது கொண்டிருந்த கரிசனம் போன்றவை இயேசுவின் சிறப்புப் பண்புகள். மேலும் பகைவரிடம் அன்பு, சபிக்கிறவருக்கு ஆசி, வெறுப்பவருக்கு நன்மை, தூற்றுவோர் மற்றும் துன்புறுத்துவோருக்காக இறைவனிடம் மன்றாடுதல் ஆகிய படிப்பினைகள் காந்தியை இயேசுவுக்கு அருகில் வாழச் செய்தன.

8. தனது இந்து சமயத் தோழர்களுக்கு ஓர் அறிவுரையாக காந்தி என்ன கூறினார் தெரியுமா? நீங்கள் பக்தியோடு இயேசுவின் போதனைகளைத் தெரிந்து கொள்ளவில்லையயன்றால் நீங்கள் நிறைவைக் காண முடியாது என்பதுதான்.

9. உலகின் பல தலைவர்களுள் எனது இதயத்தினை அதிகம் ஆக்கிரமித்துள்ளவர் இயேசு ஒருவரே. இவரின் போதனைகளே என்னுள் அதிக தாக்கத்தினை ஏற்படுத்தியுள்ளன.

10. உண்மைக்காக உயிர்நீத்த இயேசுவே அகிம்சையின் வழிகாட்டி. இவர் மனிதகுலம் கண்டிட்ட மாபெரும் போதகர். சத்தியாக்கிரகிகளின் தலைவரும், முன்னோடியும் இயேசு ஒருவரே.

இரக்கம் என்பது இறைவனின் திருப்பெயர்:

தட்டு நிறைய தங்கமும், வைரமும் தந்தால்கூட நான் எடுக்க நினைப்பதை எடுப்பேன் என்றாராம் ஹிட்லர். வரலாறு என்பது வெற்றி பெற்றோரின் சாசனம். அங்கே புகழ், வெற்றி ஆகிய இவைகளால் வெற்றி பெற்ற மக்களுக்கு மணி மகுடம் சூட்டப்படுகிறது. ஆனால் விவிலியம் காட்டும் வரலாறு மாறுபட்டது.

நாம் துன்பத்தையும், அநீதியையும் கண்டு கூக்குரலிட்டு போர் புரிய மல்லுக்கு நிற்போம். ஆனால் ஏழைகளையும், எளியவரையும் நேசிக்கும் இறைவனோ ஆயுதம் ஏந்திப் போராடும் போர்க்கடவுளாகவே செயல்படுகின்றார் என்று ஆபிரகாம் எச்.எஸ்ஸல் என்னும் யூத விவிலிய ஆசிரியர் குறிப்பிடுகின்றார்.

மன்னிப்பே வரலாற்று இறைவனின் வள்ளல் குணம் என்பது சிம்சோன், தாவீது, விபச்சாரத்தில் பிடிபட்ட பெண் ஆகியோரின் வரலாறு மூலம் அறிந்து கொள்கிறோம்.

எளியோரும், வறியோரும், கடைநிலையில் இருப்போரும் வரலாற்றின் அங்கம், அவர்கள் மறக்கப்படக்கூடாது. நீதியில்லா இரக்கம் வலுவற்றது. என்பது கர்தினால் வால்டேர்காஸ்பர் என்பரின் கூற்று. இறைநீதி என்பது இறை இரக்கத்தின் மறுபக்கம். நீதிக்காக எழுப்பப்படும் ஒவ்வொரு கூக்குரலிலும் இறை இரக்கம் இழையோடுகின்றது.

இறை இரக்கத்தினை வாழ்வாக்கிய மகான்:

‘தந்தை இரக்கம் உள்ளவராய் இருப்பதுபோல நீங்களும் இரக்கம் உள்ளவராய் இருங்கள்’ (லூக் 6 : 36) என்ற இயேசுவின் வார்த்தையினை வாழ்வில் செயல்படுத்திய மகான் இவர். தென்னாப்பிரிக்காவில் 1906, 1908, 1913 ஆகிய ஆண்டுகளில் வெள்ளையருக்கெதிராக இவர் புரிந்த போராட்டங்கள் இந்திய விடுதலைப்போருக்கு முன்னோட்டமாக அமைந்தன.

தாய்நாடு திரும்பியதும் 18.03.1919 ஆம் ஆண்டு நடைமுறைக்கு வந்த சிட்னி ரவ்லட் சட்டத்தினைக் கடுமையாக எதிர்த்தார். கருப்புச் சட்டம் எனப்பட்ட இச்சட்டத்தின் மூலம் போலீஸ், தான் சந்தேகப்படும் எவரையும், எந்த இடத்திலும், எந்த நேரத்திலும் கைது செய்யலாம். கைதியின் கருத்து கேட்கப்படாது தண்டனை அளிக்கப்படும். சத்தியாக்கிரகம் மூலம் இந்தியா முழுவதும் இதற்குக் கடும் எதிர்ப்பும், ஒத்துழையாமையும் நடைபெற்றது. இதன் விளைவாக 1919இல் பஞ்சாபில் ஜாலியன் வாலாபாக் படுகொலை நிகழ்ந்தது.

1924இல் தீண்டாமையினை ஒழிக்க காந்தியடிகள் வைக்கம் போராட்டத்தினைத் தலைமையேற்று வழிநடத்தினார். 1930, மார்ச் 12இல் தண்டியாத்திரை மூலம் உப்புக்காய்ச்சப்பட்டது. 1940 ஆம் ஆண்டு இரண்டாம் உலகப்போரில் இந்தியா போர்க்கோலம் பூணாது அகிம்சை மூலமாகவே தீர்வு காண வேண்டும் என வலியுறுத்தினார்.

இறுதியாக 1942ஆம் ஆண்டு ‘வெள்ளையனே வெளியேறு’ என்னும் இயக்கம் நாடு முழுவதும் பரவி வெள்ளையரை விரட்டியடித்தது. 1947ஆம் ஆண்டு ஆகஸ்ட் 15 அன்று பிரிட்டிஷாரின் கொடி இறக்கப்பட்டு மூவர்ணக் கொடி வானில் பட்டொளி வீசிப் பறந்தது.

இயேசுவின் உண்மைச் சீடன் & இறை இரக்கத்தின் மகான்:

மகாத்மா காந்தி திருமுழுக்குப் பெறாத ஓர் உண்மைக் கிறிஸ்தவர். சிலுவையணியாத இயேசுவின் சீடர். இறை இரக்கத்தின் ஆன்மீகக் கடமைகளாகிய அவநம்பிக்கையில் இருப்போருக்கு ஆலோசனை வழங்குதல், அறியாமையில் இருப்போருக்கு அறிவொளியூட்டுதல், பாவிகளை மனம் மாற அறிவுறுத்தல், துன்புறுவோரைத் தேற்றுதல், பிறர் இழைத்த தீமைகளை மன்னித்தல், தீமை செய்வோரைப் பொறுமையோடு ஏற்றுக் கொள்ளுதல் மற்றும் மரித்தோர் வாழ்வோருக்காகச் செபித்தல் போன்ற பண்புகள் இவரின் வாழ்வில் மிளிர்கின்றன.

மேலும் இரக்கத்தின் சமூகக் கடமைகளாகிய பசித்தோருக்கு உணவளித்தல், தாகமாயிருப்போரின் தாகம் தணித்தல், ஆடையின்றி இருப்போருக்கு ஆடை அணிவித்தல், அன்னியரை ஏற்றுக்கொள்ளுதல், நோயாளிகளைக் குணப்படுத்துதல், சிறையிலிருப்போரைச் சந்தித்தல் மற்றும் இறந்தோரை நல்லடக்கம் செய்தல் போன்ற காரியங்களிலும் ஈடுபாட்டோடு செயல்பட்டார்.

இன்றும் ஒலிக்கும் விடுதலைக் குரல்கள்:

69ஆவது விடுதலை விழாவைக் கொண்டாடும் இவ்வேளையில் பாரத தேசத்தின் பல்வேறு பகுதிகளிலும் ஒலிக்கும் விடுதலைக் குரல்கள் நாம் இன்னும் முழுவிடுதலை பெறவில்லை என்பதையே காட்டுகின்றது. குறுகி வரும் விவசாய நிலமும், கண்ணீர் சிந்தும் விவசாயிகளின் வறுமையும், மொழி, இனப் பாகுபாடுகளும், ஏழைகளின் வளர்ச்சிப் பெருக்கமும், இன்னொரு போர் இந்நாட்டுக்குத் தேவை என்பதை உணர்த்துகின்றன. இறை இரக்கத்தின் அருளினால் காந்தியப் பாதையில் நடந்து முழு உரிமை பெற்ற பாரத நாடு மலரட்டும்.

திருத்தந்தை பக்கம்

திருத்தந்தை பக்கம்

அருட்தந்தை. அ. பிரான்சிஸ், பாபநாசம்

1. இதயக் கதவுகள் திறக்கப்படட்டும் :

10 - 02 - 2016 திருநீற்றுப் புதன் அன்று தவக்காலத் தொடக்க வழிபாட்டினை திருநீறு பூசி திருத்தந்தை வழிநடத்தினார். புனித பேதுரு பேராலயத்தில் நடைபெற்ற வழிபாட்டு வேளையில் உலகெங்கும் இருந்து 1000 குருக்கள் தேர்ந்தெடுக்கப்பட்டு இறை இரக்கத்தின் தூதுவர்களாக அனுப்பி வைக்கப்பட்டனர். தமது மறையுரையில் இதயக் கதவுகள் இறைவனை நோக்கி திறக்கப்படட்டும். கீழ்க்காணும் நான்கு காரணிகள் இதற்குத் தடையாக உள்ளன.

அ. நமது தவறுகளைச் சிறிதென எண்ணுதல் அல்லது தவறுகளை நியாயப்படுத்துதல். மற்றவர்களை விட நான் ஒன்றும் பெரும் பாவியல்ல என்ற மனநிலை.

ஆ. இதயத்தின் இரகசியக் கதவைத் திறந்து பாவ நிலையிலிருந்து எழும்பிட வெட்கப்படுதல்.

இ. நமது தவறுகளிலேயே உழன்று கொண்டு தெய்வ பயம் குறைதல்.

ஈ. இதன் மூலம் ஆன்மாவின் இருள் அடர்ந்த பகுதிகளிலேயே மூழ்கிக் கிடத்தல்.

இவற்றினை அகற்றி இத்தவக்காலத்தில் நமது இதயக் கதவுகளை இறைவனுக்காய் திறந்து          வைப்போம்.

2. உரோமை நகரின் யூதச் செபக்கூடத்தில் திருந்தந்தை :

திருத்தந்தை புனித பவுல் யோவான் யூதர்களை நமது மூத்த சகோதரர்கள் என்றழைத்தார். இந்தச் சிந்தனையின் அடிப்படையில் திருத்தந்தை பிரான்சிஸ் ஜனவரி 17 அன்று உரோம் நகரில் உள்ள யூதர்களின் செபக்கூடத்திற்குச் சென்று செப வழிபாட்டில் பங்கேற்றார். திருத்தந்தையர்கள் யோவான் பவுல், 16 ஆம் பெனடிக்ட் ஆகியோருக்குப் பின் இந்தச் செபக்கூடத்திற்கு வருகை புரிந்த மூன்றாவது திருத்தந்தை இவரே. இவ்வேளையில் இறையியல் பின்னணியில் உற்று நோக்கும் போது கிறிஸ்தவர்களுக்கும், யூதர்களுக்கும் இடையில் பிரிக்கப்பட முடியாத ஒருமைப்பாடு உண்டு. யூத வேரோட்டமின்றி கிறிஸ்தவம் கிடையாது. கிறிஸ்துவின் மீதுள்ள நம்பிக்கையின் வழியாக இஸ்ராயேல் மக்கள் மீது இறைவன் கொண்டிருந்த உடன்படிக்கை ஒரு தொடர்பயணம். இப்பயணத்தினையே திருச்சபை தொடர்கின்றது என்று கூறினார்.

மேலும் இன்றைய உலகு சுற்றுச் சூழல், அமைதி மற்றும் உயிர் பாதுகாப்பு ஆகிய மூன்று சவால்களைச் சந்தித்துக் கொண்டு வருகிறது. 16 ‡ 10 ‡1943 அன்று ஆயிரத்துக்கும் மேற்பட்ட ஆண், பெண், குழந்தைகள், ஆகியோர், யூதர்கள் என்ற ஒரே காரணத்திற்காக உரோமையினின்று வெளியேற்றப்பட்டனர். அது மட்டுமின்றி மனிதாபிமானமற்ற முறையில் துன்புறுத்தப்பட்டு உயிரிழந்த அறுபது லட்சம் யூதமக்களின் துன்பங்கள் மற்றும் இவர்களின் கண்ணீர் மறக்கப்பட முடியாதே என்றுரைத்தார்.

3. கிறிஸ்தவ சமய புரட்சியின் 500 ஆவது ஆண்டு விழாவில் திருத்தந்தை பங்கேற்க உள்ளார் :

1517 ஆம் ஆண்டு அக்டோபர் 31 ஆம் நாள் மார்ட்டின் லூத்தர் ஸ்வீடன் நாட்டின் லுண்ட் என்னும் நகரில் கிறிஸ்தவ சமயத்துக்கெதிரான 95 கொள்கைப் பிரகடனங்களை வெளியிட்டார். இதன் ஐநூறாவது ஆண்டு விழா ஸ்வீடனில் கொண்டாடப்பட உள்ளது. உலக லூத்தரைன் கழகம் (ஸிற்மிஜுrழிஷ்ஐ நிலிrயிd ய்ஷ்derழிமிஷ்லிஐ) இங்குதான் உதயமானது. இதன் பொதுச் செயலாளர் மார்ட்டின் ஜீங்க் இந்நிகழ்ச்சி பற்றிக் குறிப்பிடுகையில் முரண்பாடுகளினாலும், வன்முறையினாலும் சிதறுண்டு போயுள்ள உலகுக்கு, நீதி, அமைதி, ஒப்புரவு ஆகியவற்றின் கத்தோலிக்கர் மற்றும் லூத்தரைன்கள் மத்தியில் மலரும் ஒன்றிப்பின் மூலம் வழங்க முடியும் என்கின்றார்.

திருச்சபையின் கிறிஸ்தவ ஒன்றிப்புக் கழகத் தலைவர் கர்தினால் குர்ட் கோச் என்பவரின் கூற்றுப்படி, கிறிஸ்துவ மைய அணுகுமுறையில் மரித்து உயிர்த்த இயேசுவின் மீதுள்ள நம்பிக்கையினை ஆழப்படுத்தும் விதமாக இந்த விழா அமையும். மேலும் லூத்தர் சபையில் பிறந்து கத்தோலிக்க விசுவாசத்தில் வளர்ந்து, தற்போது ஆயராகப் பணி புரியும் மேதகு ஆன்டர்ஸ் அப்போரெல்லியுஸ், நமது உலகியல் ஈடுபாட்டில் வாழும் மாந்தருக்கும் இயேசு கிறிஸ்துவுக்கும், அவரின் நற்செய்திக்கும் உயிருள்ள சாட்சிகளாக வாழ இந்த விழா அமையும் என்கின்றார்.

4. அருள்பணியாளர்களுக்கு ஒப்புரவு அருள்சாதனம் வழங்கிய திருத்தந்தை :

பிப்ரவரி 11 அன்று ஜான் லாத்தரன் பசிலிக்காவில் குழுமியிருந்த குருக்களோடு உரையாடினார். இவர்களுக்குக் கடவுளின் பெயர் இரக்கம் என்னும் புத்தகத்தை வழங்கினார். அதன் பின் அங்குள்ள சில குருக்களுக்கு பாவசங்கீர்த்தனம் கேட்டு பாவ மன்னிப்பினை அளித்தார்.

5. திருத்தந்தை மற்றும் ரஷ்ய ஆர்தடாக்ஸ் திருச்சபை தலைவர் சந்திப்பு :

மெக்சிகோ நாட்டிற்குச் செல்லும் வழியில் கியூபா நாட்டின் ஹவானா விமான நிலையத்தில் ரஷ்ய ஆர்தடாக்ஸ் தலைவர் மேன்மை தங்கிய கிரில் அவர்களை 12 ‡ 02 ‡ 2016 அன்று திருத்தந்தை சந்தித்தார். அவ்வேளையில் இருவரும் மனம் திறந்து பேசி வரலாற்றுச் சிறப்பு மிக்க அறிக்கை ஒன்றினை வெளியிட்டனர். கிறிஸ்துவின் மீது நம்பிக்கை கொண்டு, அன்னை மரியா மற்றும் புனிதர்களின் வணக்கத்தில் ஒன்றிணைந்துள்ள நாம் நம்மிடம் உள்ள

கடந்த கால கசப்புகளை மறந்து கரம் கோர்த்து வாழ்வோம். மேலும் சிரியா, ஈராக் இன்னும் மற்ற மத்திய கிழக்கு நாடுகளில் கிறிஸ்தவர்களுக்கெதிராக நடைபெறும் அநீதியான கொலைகளை வன்மையாகக் கண்டிக்கின்றோம். உலகெங்கும் வாழும் மக்களுக்கெதிராக நடைபெறும் மனிதாபிமானமற்ற முறையில் சொல்லப்படும் கோடிக்கணக்கான மக்கள் கொலைகளுக்கெதிராக உலக சமுதாயம் நடவடிக்கை எடுக்க வேண்டும் என்னும் கருத்தின் அடிப்படையிலேயே இந்த அறிக்கை அமைந்துள்ளது.

மெக்சிகோவில் திருத்தந்தை :

பிப்ரவரி 12 முதல் 18 வரை திருத்தந்தை பிரான்சிஸ் தனது மேய்ப்புப்பணி பயணத்தினை மெக்சிகோ நாட்டில் மேற்கொண்டார்.பிப்ரவரி 16 அன்று மெக்சிகோவின் பொக்கி­மாகத் திகழ்பவர்கள் இளைஞர்கள். இயேசுவின் மீது கொண்டிருக்கும் நம்பிக்கையினையே நீங்கள் செல்வமெனக் கருத வேண்டும் என கேட்டுக் கொண்டார். மேலும் தாம் அமைதியின் தூதுவராக வந்திருப்பதாகவும், இளைஞர்களின் மனதைக் கெடுக்கும் மது போன்றவற்றை விற்பவர்கள், மரணத்தின் தூதுவர்கள் என்றும் குறிப்பிட்டார்.

குருக்கள் மற்றும் துறவியரைச் சந்தித்த போது, நீங்கள் இயேசுவின் ஊதியம் பெறும் வேலைக்காரர்கள் அல்ல, மாறாக நீங்கள் அவர்களின் பணியாளர்கள். எனவே மக்களின் மகிழ்ச்சியையும், வளர்ச்சியையும் ஊனப்படுத்தும் அநீதிக்கெதிராக உரிமைக்குரல் எழுப்ப வேண்டும் எனவும் கேட்டுக் கொண்டார். 

இறை இரக்கம் தவக்கால சிந்தனை

இறை இரக்கம் தவக்கால சிந்தனை

- அருள்பணி.அ. பிரான்சிஸ், பாபநாசம்

சாம்பல் வெறுமையின் சின்னம். ஒன்றும் இல்லாமையின் அடையாளம். மண்ணிலிருந்து வந்து மண்ணுக்கே திரும்பும் மனிதன் தனது நிலையாமையினை வீடு பேறு நோக்கிப் பயணிக்க அழைத்திடும் காலமே தவக்காலம். ஈராறு ஆண்டுக்கொரு முறை மகா மகக் குளியல் மூலம் மக்களைப் புனிதமடையச் செய்யும் மகா மக விழா குடந்தை நகருக்குப் பெருமை சூட்டுவது பிப்ரவரி மாதம். இம்மாதம் 10ஆம் நாள் தவக்காலத்தின் முதல் நாள். அடுத்த நாள் உலக நோயாளர் தினமாகிய லூர்தன்னை பெருவிழா. இரக்கமிகு விண்ணகத் தந்தையின் காணுகின்ற முகமாகிய இயேசுவை ஈன்றெடுத்த மரியா 1858 பிப்ரவரி 11 முதல் அதே ஆண்டு ஜீலை வரை பிரான்ஸ் நாட்டின் பிரன்னிஸ் மலைத் தொடரில் உள்ள மசபியேல் என்னும் குகையில் பெர்னதெத் என்ற 12 வயது சிறுமிக்கு காட்சி தந்தார். லூர்து என்னும் சிற்றூர் இன்று அனைவரின் சிந்தை கவரும் நகராகத் திகழ்ந்து வருகின்றது. 

 இறை - மனித உறவு, இறைவனின் இரக்கத்தின் வெளிப்பாடாகும். கடவுளோடு தான் செய்து கொண்ட உடன்படிக்கையினை மனிதன் மீறி பிரமாணிக்கம் இன்றி வாழ்ந்த வேளைகளில் இறைவனின் இரக்கமே மனித குலத்தினை மீட்டது. பாவிகளை அல்ல, இரக்கத்தையே விரும்புகிறேன்.... நேர்மையாளர்களை அல்ல, பாவிகளையே அழைக்க வந்தேன் (மத். 9 : 13) என்ற சொற்றொடர் மூலம் தனது இரக்கமிகு பண்பினை வெளிப்படுத்துகின்றார் இறைவன். 

இறை - மனித உடன்பாடு இறை இரக்கத்தின் அடிப்படைக் கூறு. தனது பிரமாணிக்கம் இழந்து இஸ்ரயேல் மக்கள் தனது மனம் போன போக்கில் வாழ்ந்துவந்த போதெல்லாம் உண்மையும், நீதியும் உள்ள கடவுளாக அல்ல. ஊதாரியின் தந்தையாகத் தனது இரக்கத்தினை வெளிப்படுத்துகின்றார். விடுதலைப் பயண நூல் 32 - 34 வரை உள்ள பிரிவுகளை வாசித்தால் இறைவனின் இரக்கம் தெளிவாகப் புலப்படும். எகிப்தின் அடிமைத் தளையறுத்து பாதம் நனையாமல் செங்கடலைக் கடந்து வரச் செய்தார் யாவே இறைவன். 40 ஆண்டுகள் பாலை நிலத்தில் மன்னா, காடைகள், பாறையின் தெளிந்த நீர் ஊற்றால் உணவளித்துக் காப்பாற்றினார் இறைவன். சீனாய் மலை மீதேறி இறைவன் தந்த 10 கற்பனைகளை மோசே சுமந்து வருகின்றார். பிரமாணிக்கத்தினை மீறி பொன் கன்று வழிபாட்டின் விழாக்கோலம் மோசேயின் கோபக் கனலைத் தூண்டுகிறது. இரக்கமிகு இறைவன் இன்னொரு முறை தனது கட்டளைகளை வழங்குகின்றார். இரண்டாம் பிரதி திருச்சட்டக் கற்பலகைகளைக் கொண்டு வந்த மோசே அக்களிப்போடு பின்வரும் வார்த்தைகளில் இறைப்புகழ் பாடுகின்றார். ஆண்டவர்! ஆண்டவர்! இரக்கமிக்க பரிவும் உள்ள இறைவன் சினம் கொள்ளத் தயங்குபவர். பேரன்பு செய்பவர்; கொடுமையையும், குற்றத்தையும், பாவத்தையும் மன்னிப்பவர் (வி. ப. 34 : 6 - 7) விண்ணகத் தந்தையின் இந்தக் காதல் ஓவியம் இறைமகனின் மனுவுருவாதலில் நிறைவு பெறுகின்றது. இறை இரக்கமே மனுவாகி நம்மில் இரண்டறக் கலக்கின்றது. இந்த இரக்கமே பாவி தன்னை உற்று நோக்கி, மனம் மாறி நம்பிக்கை கொண்டு வாழ அழைக்கின்றது என்று திருந்தந்தை பிரான்சிஸ் தனது இரக்கத்தின் முகம் என்ற மடலில் எண் : 8 மற்றும் 21இல் குறிப்பிடுகின்றார். 

 இறைவனின் இரக்கப் பெருக்கினுக்குத் தன்னை முற்றுமாக அர்ப்பணித்த இறையன்பை மரியா தனது காட்சிகள் வழியாக அவ்வப்போது மனுக்குலம் தழைத்திடும் வழிகாட்டுதலை வழங்கி வருகின்றார். குறிப்பாக இம்மாதம் 11 அன்று நினைவு கூரும் லூர்து நகர் காட்சிகள் வழியாக கீழ்க்காணும் 4 கருத்துக்களை இத்தவக்காலத்தில் செயல்படுத்திட மரியா நம்மைப் பணிக்கின்றார். 

அ) ஏழ்மை : மாடடைக் குடிலில் விண்ணகத் தந்தையின் காணுகின்ற முகமாகிய இயேசு உதயமானார். அதே பான்று மாதா காட்சி தந்த மசபியேல் குகை பன்றிகள் அடையும் இடமாகும். இறைவனின் நன்மைத்தனம், தூய்மைத்தனம் ஆகியவை மனிதனின் ஏழ்மைத் தனத்தில் சங்கமிக்கின்றன. ஏழ்மையே மாட்சிமை என்பது இந்நிகழ்ச்சி மூலம் தெளிவாகின்றது. 

 ஆ) தவம் : ‘துர்நாற்றம் மிக்க, அழுக்குப் படிந்த பன்றிகளின் எச்சம் கலந்த மண்ணைத் தோண்டிப்பார்’ என்று விமலனின் தாய் கூறுகின்றார். பெர்னதெத்தும் அவ்வாறே செய்கின்றார். முகம் சுளிக்க வைக்கும் பன்றிகளின் எச்சம் கலந்த மண்ணிலிருந்தே புனிதம் உலக மக்களைத் தேடிவந்தது. இந்நிகழ்ச்சி பற்றிப் பிறரிடம் கூறிய வேளையில் மக்களின் இச்சகமான பேச்சு, எகத்தாளம் மிக்க அனுமானச் சொல் இவளைக் கூனிக் குறுகச் செய்தது. இவ்வாறு இயேசுவின் பாடுகளில் பங்கேற்றுத் தவ வாழ்வு வாழ்ந்தாள் பெர்னதெத். நாமும் இவள் போன்று தவ வாழ்வு வாழ்வோம். 

 இ) செபம் : மாதா தனது ஒன்பதாவது காட்சியில் பன்றியின் எச்சம் மிக்க மண்ணைத் தோண்டுகின்ற வேளையில் முதலில் சேறும், சகதியும் கலந்த நீர் பீறிட்டு வருகிறது. இந்நீரை இச்சிறுமி அள்ளிப் பருகுகின்றார். அதன்பின் சுவை மிகுந்த, உடல் மன நோய் தீர்க்கும் அருமருந்தாக நீராக இது மாறுகின்றது. பாவத்தில் உழன்று கொண்டிருக்கும் பாவி தன்னிலை நீங்கிட கண்ணீர் சிந்திக் கசிந்துருகி மன்றாடுகின்ற போது பாவ அழுக்கு நீங்கி ஆன்ம, உடல், மன ஆரோக்கியம் பெறுகின்றார். முடக்குவாதமுற்ற மனிதனை இயேசு குணப்படுத்தும் போது, ‘உன்பாவங்கள் மன்னிக்கப்பட்டன’ (மாற்கு 2 : 1 : 12) என்று கூறி முழுச் சுகத்தினை அளிக்கின்றார்.

 ஈ) திருச்சபை : நீ கண்ட காட்சி பற்றி திருச்சபையின் தலைவர்களிடம் அறிவி என்று தனது பதிமூன்றாவது காட்சியில் பெர்னதெத்திடம் அன்னை மரியா கூறுகின்றார். இதன் நோக்கம் என்ன? மக்கள் குழுவாக தங்களின் மொழி, இனம், மதம், நாடு என்ற பிரிவினை மறந்து திருப்பயணம் மேற்கொள்ள வேண்டும். அவ்வேளையில் ஒரே வானம், ஒரே உலகம் என்ற நிலை உருவாகும். தீவிரவாதம், பிரிவினை வாதம் பெருகி வரும் .க்காலத்தில் இறை இரக்கத்தின் மக்களாக வாழுகின்ற சமூகத்தின் அடையாளச் சின்னமாக திருச்சபை திகழ வேண்டும். இதுவே இரக்கத்தின் அரசியாகிய அன்னை மரியா நமக்குத் தருகின்ற செய்தியாகும். இந்த இறை இரக்கத் தவக்காலத்தில் கீழ்க்காணும் வரிகள் நமது வாழ்வில் அருள் பெறும் வழிகாட்டிகளாகட்டும்.

இறை இரக்கம் மனிதரானார் ...... நாம் இறை இரக்கத் தூதர்களாகிட .....

இறை இரக்கம் மனிதரானார் ......

நாம் இறை இரக்கத் தூதர்களாகிட ......

- அருள்தந்தை அ. பிரான்சிஸ், பாபநாசம்

உலக மீட்பர் உதயமான வரலாற்று நிகழ்வுதான் கிறிஸ்மஸ். விண்ணகம் வாழும் இறைவன், கன்னி மரியாவின் வயிற்றில் கருவாகி, உருவாகி மனிதருள் ஒருவரானார். இதனையே,
உருவிலான் உருவாகி உலகில் ஒரு மகனுதிப்பக்
கருவிலாக் கருத்தாங்கிக் கன்னித்தாய் ஆயினையே
என்று வீரமாமுனிவர் கூறுகின்றார்.கன்னி கருவுற்று ஓர் ஆண்மகவைப் பெற்றெடுப்பார். அக்குழந்தைக்கு இம்மானுவேல் எனப் பெயரிடுவர். (எசாயா 7 : 14) என்று இறைவாக்கினர் எசாயா முன்னறிவித்தது இயேசுவின் பிறப்பில் நிறைவுறுகின்றது. இயேசு பிறப்பின் நிகழ்வுகளில் வானதூதர்களின் செயல்பாடுகளைக் கீழ்க்கண்டவாறு காணலாம்.
1. கபிரியேல் வானதூதரால், திருமுழுக்கு யோவான் பிறப்பின் முன் அறிவிப்பு (லூக் 1 : 5 - 20)
2. அன்னை மரியாவுக்கு, கபிரியேல் வானதூதரின் இயேசு பிறப்பின் முன் அறிவிப்பு (லூக் 1 : 26 - 38)
3. யோசேப்பின் ஐயப்பாடு நீங்கிட பெயரிடப்படாத வானதூதரின், செயல்பாடு (லூக் 1 : 18 - 21)
4. இடையர்களுக்கு மட்டும் விண்ணகத்தூதர் பேரணியினரின் மெசியாவின் பிறப்பு பற்றிய மகிழ்ச்சியின் செய்திப் பறைசாற்றப்படல் (லூக் 2 : 8 - 14)
5. ஏரோதுவிடமிருந்து குழந்தை இயேசுவை காப்பாற்ற, எகிப்துக்குச் செல்லுமாறு யோசேப்புக்கு அறிவுறுத்திய வானதூதர் (மத் 2 : 13 - 15)
விண்ணுலகத் தூதர்களின் காட்சிகள் வழியாக நம் உள்ளத்தின் ஆழத்தில் இருத்த வேண்டிய கருத்துக்களை ஆழ்ந்து சிந்திப்போம்.
அ. திருமுழுக்கு யோவானின் தலையாய பணி (லூக் 1 : 17) :
பழைய ஏற்பாட்டு இறைவாக்கினர்களுள் கடைசியானவர் மலாக்கி. கி.மு. ஐந்தாம் நூற்றாண்டில் எருசலேம்
ஆலயம் கட்டப்பட்டதற்குப் பின் இந்நூல் எழுதப்பட்டது. குருக்களும், மக்களும் கடவுளுக்குப் பிரமாணிக்கமாய் இல்லாமல் நெறி தவறி வாழ்ந்தனர். இறைவனின் திருப்பெயருக்குக் களங்கம் ஏற்படுத்தினர். எனவே தம் மக்களைத் தண்டித்துத் திருத்திட ஆண்டவர் வருவார். அவரது வருகையை ஆயத்தம் செய்ய தம் தூதரை அனுப்புவார் என்பதே நூலின் மையக்கருத்து. அத்தகு வரலாற்றுப் பின்னணியில் திருமுழுக்கு யோவானின் பிறப்பு பற்றி உற்றுநோக்க நாம் அழைக்கப்படுகின்றோம்.
யோவானின் முக்கிய பணி, ஆண்டவருக்கேற்ற மக்களினத்தை தயாரிப்பது. இதற்கு மூன்றுவித பயிற்சிகளை மேற்கொள்ள வேண்டும். எலியாவின் உளப்பாங்கையும், வல்லமையையும் பெற்றிருத்தல். பாகால் இறைவாக்கினர்களோடு மல்லுக்கு நின்று இஸ்ரயேலின் ஆண்டவரே கடவுள் என்பதை நிலை நாட்டியவர் இறைவாக்கினர் எலியா (1 அரசர் 18). அடுத்து, தந்தையரும், மக்களும் உளம் ஒத்துப் போகச் செய்ய வேண்டும். மூன்றாவதாக நேர்மையாளர்களின் மனநிலையைக் கீழ்ப்படியாதவர்கள் செய்ய வேண்டும்.
ஆ. அன்னை மரியாவுக்கும், கபிரியேல் வானத்தூதருக்கும் இடையில் நடந்த சந்திப்பு (லூக்1 : 26 -32) :
அருள் மிகப் பெற்றவரே வாழ்க! ஆண்டவர் உம்மோடு இருக்கிறார் என்ற வாழ்த்தொலியோடு ஆரம்பமாகும் இந்தச் சந்திப்பு. ஓர் இறை ‡ மனித உறவு நெருக்கத்தின் உரையாடலாகத் தொடர்கிறது.
3. மரியாவின் மனதிலோ ஒரு கலக்கம். உள்ளத்திலே ஒரு தயக்கம். எப்படி நிகழுமோ என்றதொரு ஏக்கம். அதன்பின்னர் எழுந்ததுவே, ‘இதோ! ஆண்டவரின் அடிமை’ என்ற மன உறுதிப்பாட்டின் தாக்கம். இத்தாக்கத்தின் நான்கு வெளிப்பாடுகள்: 1. கருவுற்று ஒரு மகனைப் பெற்றெடுக்க வேண்டும்.
2. அவரது பெயர் இயேசு.
3. அவர் பெரியவராய் இருப்பார்; உன்னத கடவுளின் மகன் எனப்படுவார்.
4. அவருடைய தந்தையாகிய தாவீதின் அரியணையை ஆண்டவராகிய கடவுள் அவருக்கு அளிப்பார். அவர் யாக்கோபின் குடும்பத்தின் மீது என்றென்றும் ஆட்சி செலுத்துவார். அவருடைய ஆட்சிக்கு முடிவே இராது.
இஸ்ரயேல் மக்களின் விடுதலை தாகத்தைத் தணித்து, உரிமை வாழ்வு வழங்கி, மகிழ்ச்சி மழை பொங்கிட, மெசியா தோன்றுவார் என்று இறைவாக்கினர்கள் முன்னறிவித்தனர். காத்திருந்த மக்களின் கண்ணீர் துடைக்கப்படவில்லை. மெசியா பிறப்பு கானல் நீராகி விடுமோ என்று தவித்துக் கொண்டிருந்தார்கள். ஆனால் காலம் நிறைவேறிய போது திருச்சட்டத்திற்கு உட்பட்டிருந்த நம்மை மீட்டுத் தம் பிள்ளைகள் ஆக்குமாறு கடவுள் தம் மகனைப் பெண்ணிடம் பிறந்தவராகவும், திருச்சட்டத்திற்கு உட்பட்டவராகவும், அனுப்பினார். (கலாத் 6 : 4 - 5)

இ. விண்ணகத்தூதர் பேரணியின் வாழ்த்து :
சாமக்காவல் காத்து வந்த இடையர்களுக்குக் காட்சி தந்த விண்ணுலகத் தூதர்கள் உரைத்த செய்தி நான்கு பிரிவுகளைக் கொண்டதாகத் திகழ்கின்றது.

‡ அஞ்சாதீர்கள், இதோ, எல்லா மக்களுக்கும் பெரும் மகிழ்ச்சியூட்டும் நற்செய்தியை உங்களுக்கு அறிவிக்கிறேன். அது என்ன?
‡ இன்று ஆண்டவராகிய மெசியா என்னும் மீட்பர் உங்களுக்காகத் தாவீதின் ஊரில் பிறந்திக்கிறார். அடையாளம் என்ன?
‡ குழந்தையைத் துணியில் சுற்றித் தீவனத் தொட்டிலில் கிடத்தியிருப்பதைக் காண்பீர்கள். இத்தெய்வக் குழந்தை தனது பிறப்பால் உலகுக்குத் தரும் செய்தி என்ன தெரியுமா?
‡ உன்னதத்தில் கடவுளுக்கு மாட்சி. உலகில் அவருக்கு உகந்தோருக்கு அமைதி.

மகிழ்ச்சியே கிறிஸ்து பிறப்பு நமக்குக் கொடுக்கும் கொடை. மது, மங்கை கண்களுக்குக் களிப்பூட்டும் காட்சிகள்,  சொகுசான வாழ்க்கை இவற்றிலிருந்து கிடைக்கும் சந்தோ­ம் தற்காலிகமே. நிலையில்லா இவ்வுலகில் மகிழ்ச்சி மழை பொழிந்திடவே இயேசு நம்மில் ஒருவரானார்.
கிறிஸ்து பிறப்பின் செய்தி, மூன்று பண்புகளைக் கொண்டது. பாவத்தில் அமிழ்ந்திருந்தாலும் இஸ்ரயேல் மக்களைக் கைவிடாது அவர்கள்மீது தான் கொண்டுள்ள அன்பையும், இரக்கத்தையும், பிரமாணிக்கத்தையும் இறைவன் வெளிப்படுத்துதல். மக்களின் மீட்பு, இறைவனுக்கு மகிமை, மனிதனுக்கு மகிழ்ச்சி. நீதியை விட இரக்கமே உருவானவர் இறைவன். இரக்கத்தின் மறுபதிப்பே குழந்தை இயேசு.
2013ஆம் ஆண்டு மார்ச், 17 அன்று உரோமையின் ஆயராகப் பொறுப்பேற்ற பின்னர் தனது முதல் பகல் 12 மணி மூவேளைச் செப வேளையில், ‘உலக மாற்றத்திற்கு இறை இரக்கத்தினை உணர்ந்து செயல்படுதலே அடித்தளமாய் அமையும்’ என்று திருத்தந்தை பிரான்சிஸ் குறிப்பிட்டார்.
1992 ஆம் ஆண்டு ஆயராகப் பொறுப்பேற்ற பொழுது, இறை இரக்கமே இவரின் விருது வாக்கானது. ‘உங்கள் தந்தை இரக்கம் உள்ளவராய் இருப்பது போல, நீங்களும் இரக்கம் உள்ளவராய் இருங்கள்’ (லூக் 6 : 36) என்பதனை மையமாகக் கொண்டே 2016ஆம் ஆண்டு இறை இரக்க ஆண்டாக திருச்சபை அறிவித்துள்ளது. ஆன்மீக மறுமலர்ச்சிக்கான தொடர்பயணமாக இந்த ஆண்டு அமையும். 2015 டிசம்பர் 8 அமல அன்னை விழா முதல் 2016 நவம்பர் 20 கிறிஸ்து அரசர் பெருவிழா வரையிலான இந்நாட்கள் இறை இரக்கப் பெருக்கின் காலமாக அமையட்டும்.
இந்த இறை இரக்க ஆண்டின் நுழைவாயிலில் நாம் கொண்டாடும் கிறிஸ்மஸ் இறை இரக்கக் கிறிஸ்மஸ் ஆகட்டும். பாவம் போக்கி மகிழ்ச்சி வழங்கிட வந்திட்ட இறை இரக்கக் குழந்தை இயேசுவின் பிறப்பு விழா இறை இரக்கத்தின் பிறப்பினை உலகுக்கு பறைசாற்றிய வானதூதர்கள் போன்று நாமும் இறை இரக்கத்தின் தூதர்களாவோம்.
ஒருமையுடன் நினது திருவடி நினைக்கின்ற உத்தமர் தம் உறவு வேண்டும்.
உள்ளொன்று வைத்துப் புறமொன்று பேசுவார் உறவு களவாமை வேண்டும்.
பெருமை பெறும் நினதுபுகழ் பேச வேண்டும். பொய்மை பேசாதிருக்க வேண்டும்.
மதிவேண்டும், நின்கருணை நிதி வேண்டும். நோயற்ற வாழ்வில் நான் வாழவேண்டும்.
                                                                                                                                    ‡ வள்ளலார்.
மேற்காணும் வரிகள் நமது தினசரி செபமாகட்டும். இச்செபம் நமது வாழ்வாகட்டும்.
இறைத்தந்தையின் இரக்கத்தினை உணர்ந்து பாவத்தளையிலிருந்து விடுபடுவோம். இன்றைய உலகுக்குத் தேவை விடுதலை, சாவினின்று விடுதலை, சாபத்தினின்று விடுதலை, நோயிலிருந்து விடுதலை.இறை இரக்கத்தினை உணர்வோம். பாவ வாழ்வினை விட்டெழுந்து இறை இரக்கக் குழந்தை பிறப்பின் மகிழ்ச்சியில் மகிழ்வோம். நாமும் இறை இரக்கத் தூதர்களாவோம்.

இறை இரக்கத்தின் ஆண்டில்

திருத்தந்தை அவர்கள் இறை இரக்கத்தின் ஆண்டில் கடைபிடிக்கூடிய செயல்பாடுகளாகக் கீழ்க்கண்ட செயல்பாடுகளைக் குறித்து காட்டுகிறார்.

1. மன்னிப்பின் மாண்பாளராக வாழ்தல் :
    விண்ணகத் தந்தையின் மன்னிக்கும் பண்பினை கத்தோலிக்கச் சமூகம் தனதாக்கிக் கொண்டு மன்னிப்பினை வழங்கி மன்னிப்பினைப் பெற்று வாழ்தல் வேண்டும்.

2. கருக்கலைப்பு புரிந்தோருக்கான பாவ மன்னிப்பு :
    கருக்கலைப்பு செய்திட்ட பெண்கள் மனதுருகிக் கண்ணீரோடு பாவ அறிக்கை செய்திட்டால் இவர்களுக்கு அருள் பணியாளர்களே பாவ மன்னிப்பு வழங்கலாம். முன்பு இப்படிப்பட்டவருக்கு மன்னிப்பினை அளிக்கும் உரிமை மறைமாவட்ட ஆயர்களுக்கே உரியதாயிருந்தது.

3. புனித பத்தாம் பத்திநாதர் சபைக் குருக்களுக்கான அங்கீகாரம் :
    இரண்டாம் வத்திக்கான் சங்கம் கொணர்ந்த மறுமலர்ச்சிக் கொள்ளைகளை ஏற்றுக் கொள்ளாது பழைமைவாதிகளாகப் பேராயர் லெபேபர் அவர்களின் தலைமையில் திருத்தந்தை  புனித பத்தாம் பத்திநாதரின் துறவற சபை செயல்பட்டு வருகிறது. இதில்; இணைந்து செயல்படும் அருள்பணியாளர்கள் மன்னிக்கப்பட்டு தாய் திருச்சபையில் இணைந்ததாகக் கொள்ளப்படுவர்.

4. இறை இரக்கத்தின் திருத்தூதர்கள் :
    நற்செய்திப் பணியினுக்கு மன்னிக்கும் பண்பே திறவுகோல். எனவே மன்னிக்கும் பண்பு கொண்டோரை உள்ளடக்கிய இறை இரக்கத்தின் திருத்தூதர்கள் என்ற அமைப்பு ஏற்படுத்தப்படும். இந்தக் குழுவில் இணைந்து செயல்படும் அருள் பணியாளர்களுக்கு கருக்கலைப்பு புரிந்தோர் மற்றும் பாவ வாழ்வில் உழல்வோரின் பாவங்களை மன்னிக்கும் சிறப்பு அதிகாரம் மறைமாவட்ட ஆயரால் அளிக்கப்படும்.

5. உடல் சார்ந்த இரக்கச் செயல்கள் :
    பசியோடிருப்போருக்கு உணவளித்தல், தாகமுற்றோரின் தாகம் தணித்தல், ஆடையற்றோருக்கு ஆடை வழங்குதல், அந்நியரை வரவேற்றல், நோயுற்றோரை நலம் பெற செய்தல், சிறையிலிருப்போரைச் சந்தித்தல் மற்றும் இறந்தோரை அடக்கம் செய்தல்.

6. ஆன்மீக இரக்கச் செயல்கள் :
    சந்தேகமுற்றோருக்கு ஆலோசனை வழங்குதல், அறியாமையில் இருப்போருக்கு கற்பித்தல், பாவிகள் மனந்திரும்ப ஊக்குவித்தல், துன்பத்தில் உழல்வோருக்கு உதவுதல், தவறிழைப்போரின் பாவங்களை மன்னித்தல், தீமை புரிவோருக்காகப் பொறுமையுடன் செபித்தல், வாழ்வோர் மற்றும் இறந்தோருக்காக இறைவனிடம் வேண்டிக் கொள்ளுதல்.

7. சுற்றுச்சூழல் பாதுகாப்பு :
    சுற்றுச்சூழல் பாதுகாப்பினால் ஏற்படும் தீமைகளை களைந்திட முயற்சிகளை மேற்கொள்ளுதல், சாத்தானின் எச்சம் தான் முதலாளித்துவக் கோட்பாடு. இதனால் விளையும் புவி வெப்ப மயமாதல் அறவே தவிர்க்கப்படல் வேண்டும்.

8. ஏழையர் மற்றும் உதவியற்றோருக்குத் தஞ்சம் :
    சமூகத்தில் புறந்தள்ளப்பட்ட ஏழையர், அனாதைகள் மற்றும் அகதிகளுக்கு அடைக்கலம் தந்து இறைவனின் இரக்கத்தினையும், கருணையினையும் உணர்ந்திடச் செய்தல் வேண்டும்.

இறை இரக்கத்தின் திருத்தூதர்
புனித பாஸ்டினா கோவல்ஸ்கா
(25, ஆகஸ்ட் 1905 ‡ 5 அக் 1938)
    போலந்து நாட்டின் குளோகோலிக் என்னும் கிராமத்தில் தனது பெற்றோரின் 10 குழந்தைகளில் மூன்றாவதாகப் பிறந்தவர் யஹலினா கோவல்ஸ்கா. இவர் வார்சா நகரில் உள்ள இரக்கத்தின் அன்னை துறவற சபையில் தன்னை இணைத்து, இறைவனின் இரக்கத்தில் நம்பிக்கை கொண்டு துறவு வாழ்வு வாழ்ந்தார். யஹலினா என்னும் இவரின் இயற்பெயர், பேறுபெற்றவர் என்னும் பொருள் கொண்ட பாஸ்டினா என்ற பெயரோடு 30.04.1926 அன்று துறவற ஆடை பெற்றார்.
    தனது கடின செப, தப வாழ்வினால் இயேசுவின் இரக்கப்பெருக்கினை பலமுறை காட்சிகளில் கண்டார். அக்காட்சிகளில் இறைவன் தந்த செய்திகளைத் தனது குறிப்பேட்டில் பதிவு செய்தார். இவரின் ஆன்மீக குரு அருள்திரு. மைக்கின் சொபோக்கோ என்பவரின் ஆலோசனைப்படி அருள்சகோதரி பாஸ்டினா காட்சியில் கண்ட இயேசுவின் திருஉருவம் வரையப்பட்டது. நமதாண்டவரின் திரு இதயத்திலிருந்து ஒளிக்கதிர்கள் வெளிப்பட்ட அந்த ஓவியத்தின் கீழ் இறைக்கட்டளைப்படி இயேசுவே உம்மில் நான் நம்பிக்கை வைக்கிறேன் என்ற வாசகம் பொறிக்கப்பட்டது.
    1937ஆம் ஆண்டு கிராக்கோ நகரில் இறை இரக்கத்தின் ஆண்டவர் ஆலயம் எழுப்பப்பட்டு இதே திருத்தலத்தில் அருள் சகோதரி பாஸ்டினாவின் உடல் 1955ஆம் ஆண்டு அடக்கம் செய்யப்பட்டது. இந்தத் திருத்தலப் பேராலயத்திலிருந்துதான் இறை இரக்கத்தின் ஊற்று வழிந்தோடி உலகெங்கும் பாய்ந்தோடி இறைமக்களின் வாழ்வினை வளப்படுத்தி வருகின்றது.
    திருத்தந்தை இரண்டாம் ஜான்பால் உயிர்ப்புக் காலத்தின் இரண்டாம் ஞாயிற்றக் கிழமையினை இறை இரக்க ஞாயிறு எனப் பறைசாற்றினார். இறைவனின் இரக்கத்தினை உலகிற்கு அருள்சகோதரி பாஸ்டினா அவர்களால் இறை இரக்கத்தின் திருத்தூதர் எனப் பெயரிட்டு 18.04.1993 அன்று இவரை அருளாளர் நிலையினுக்கு உயர்த்தினார். மூவாயிரமாண்டின் முதல் புனிதையாக 30.04.2000 அன்று திருத்தந்தை ஜான்பால் இந்த அருள்சகோதரியைப் புனிதை என்னும் பட்டமளித்து பெருமைப்படுத்தினார்.
    1978லிருந்து 2005 வரை 27 ஆண்டுகள் திருச்சபையை வழிநடத்திய திருத்தந்தை ஜான்பால் இறை இரக்கப் பக்தியை உலகெங்கும் பரப்பினார்கள். இன்றைய உலகுக்குத் தேவை இரக்கம் நிறைந்த மனங்கள். இறை இரக்கத்தின் ஆற்றல் உலகை நிரப்பி மக்கள் மகிழ்ச்சியோடும், மன நிறைவோடும் வாழ்ந்திட எதிர்வரும் இறை இரக்கத்தின் ஆண்டு அருள்புரியட்டும்.

- அருள்பணி.அ. பிரான்சிஸ்,  பாபநாசம்