செப்டம்பர் மாத புனிதர்கள் அருட்சகோதரி. G. பவுலின்மேரி,FSAG

செப்டம்பர் மாத புனிதர்கள்

 அருட்சகோதரி. G.  பவுலின்மேரி,FSAG

செப். 3 புனித பெரிய கிரகோரியார்

இவர்  உரோமையில் கி.பி 540 ஆம் ஆண்டு பிறந்தார். இவரது கல்வியறிவைக் கண்ட ஜஸ்டின் பேரரசர் உரோமை நகரின் பிரதம நீதிபதி ஆக்கினார். இவருடைய தந்தை இறந்தப்பின் சிசிலி நாட்டில் ஆறு துறவற மடங்களை அமைத்து, உரோமையில் உள்ள தமது வீட்டை ஏழாவது மடமாகக் கட்டி இவரும் அங்கு துறவியானார். 590ஆம் ஆண்டு செப் ‡ 3 ஆம் நாள் திருத்தந்தையாக உயர்த்தப்பெற்றார். ஏழை எளியவர்களுக்கு உதவினார். திருமறையை பரவச்செய்து அதனை உறுதிப்படுத்தினார். ஒழுக்க நெறி, இறையியல் சார்ந்த பல நூல்களை எழுதியுள்ளார். 604இல் இறைவனடி சேர்ந்தார்.

 செப்.  8 புனித கன்னிமரியாவின் பிறப்பு

கலிலேயா நாட்டில் உள்ள நாசரேத் என்னும் சிற்றூரில் சுவக்கின் ‡ அன்னம்மாள் என்ற வயது முதிர்ந்த தம்பதியருக்கு மரியா பிறந்தார். உலகிற்கு புதுவாழ்வு தந்தவர் இயேசு.அவரின் தாய் பிறந்த நாளின் விழா இது. மரியன்னைக்கு நாம் செய்யும் சிறந்த  அன்பளிப்பு அன்பு, தாழ்ச்சி, பொறுமை, கற்பு, கீழ்படிதல் முதலிய புண்ணியங்களை கடைப்பிடிப்பதே  7 ஆம் நூற்றாண்டு முதல் இவ்விழா சிறப்பிக்கப்படுகிறது. இன்று பெண் குழந்தைகள் தினம் என்றும் கொண்டாடப்படுகிறது. இந்தியாவில் பெண் பிள்ளைகளை வரமாகப் பார்க்காமல், பாரமாக பார்க்கிறார்கள். இந்த தவறான வழக்கு அழிய வேண்டும்.

 செப்.  13 புனித கிறிசோஸ்தம் அருளப்பர் (344- 407)

அந்தியோக்கியாவில் கி.பி 349 இல் பிறந்தார். கல்வியை மிகச் சிறப்பாக கற்றுத் தேர்ந்தார். தவ வாழ்வை மேற்கொண்டு, மறைப்பணியாளர் பட்டம் பெற்றார். 397 இல் கொன்ஸ்தாந்தி நோபிளுக்கு ஆயராக தேர்ந்தெடுக்கப் பெற்று மிகச் சிறப்புடன் பணியாற்றினார். மறைப்பணியாளர்களின் பணிகளை அறநெறிப்படுத்த முயன்றார் ஆயர். மற்ற அனைவரின் வெறுப்புக்கு ஆளாகி செயலாற்ற முடியாதவரானார். இருமுறை நாட்டை விட்டுச் செல்ல வற்புறுத்தப்பட்டார். கிறிஸ்தவ வாழ்வை நெறிப்படுத்த நிறைய மறையுரையாற்றினார். புத்தகங்கள் எழுதினார். எனவே பொன் வாய் அருளப்பர் என அழைக்கப்பெற்றார். 407 இல் இப்புனிதர் இறந்தார்.

 செப். 15 புனித வியாகுல அன்னை 

              மரியாவின் ஏழு வியாகுலங்கள்:

 1. சிமியோன் இறைவாக்கு.  2.எகிப்துக்கு தப்பிச் சென்றது.   

3. காணாமற்போன இயேசுவை மூன்று  நாட்களாய் தேடியது.  4. கல்வாரிக்கு சிலுவை சுமந்து போன இயேசுவை வழியில் சந்தித்தது. 5. மரியாள் சிலுவையடியில் நின்றது. 6. இயேசுவை சிலுவையிலிருந்து இறக்கி  மடியில் வைத்திருந்தது. 7. இயேசுவை அடக்கம் செய்தது. இத்திருவிழா செப்டம்பர் 3 ஆம்  ஞாயிறு கொண்டாடப்பட வேண்டும் என உரோமை பட்டியலில் இடம் பெற்றது. ஆனால் 1913 ஆம் ஆண்டிலிருந்து செப்டம்பர் 15 ஆம் நாளுக்கென்று குறிக்கப்பட்டு அதனை சிறப்பித்து வருகிறோம்.

 செப்.  17 புனித இராபர்ட் பெல்லார்மின் (1542 - 1621)

  இவர் தஸ்கனி பகுதியில் மோன்தே புல்சியானோ நகரில் கி.பி 1542 இல்  பிறந்தார். உரோமையில் இயேசு சபையில் சேர்ந்து மறைப்பணியாளர் பட்டம் பெற்றார். கத்தோலிக்க மறையைப் பாதுகாக்கும்  வகையில்  எதிர்ப்பாளர்களுடன் தீவிரமாக விவாதங்கள் செய்து, உரோமைக் கல்லூரியில் இறையியல் கற்றுத்தந்தார். பிறகு, கர்தினாவாக உயர்வு பெற்று, காப்புவா மறைமாவட்ட ஆயரானார். அக்காலத்தில் எழுந்த ஐயப்பாடுகள் பலவற்றையும்  தெளிவுபடுத்த துணையாயிருந்தார். புனித கொன்சாகா ஞானப்பிரகாசியார் இவரின் ஆன்ம குரு. இவர் துறவிகளுக்கு பெரும் முன்மாதிரிகை. தூய்மை, தாழ்ச்சி, கீழ்படிதல் ஆகிய பண்புகளின் முன்னோடியாக விளங்கினார். ஆயரான இவர் தம் மந்தையை எல்லையற்ற அன்புடன் பராமரித்தார். 1621, செப்டம்பர் 17 இல் உரோமையில் இறந்தார். 

செப்.  21 புனித மத்தேயு

முதல் நற்செய்தி நூலை எழுதியவர். பன்னிரெண்டு திருத்தூதர்களில் ஒருவர். இவர் பாலஸ்தீனாவில் உள்ள கப்பர்நாகூமில் பிறந்தார். இயேசுவால் அழைக்கப்பெற்ற காலத்தில் சுங்கத் துறை பணியில் இருந்தார். எபிரேய மொழியில் நற்செய்தி நூலை எழுதினார் என்றும் இவர் கீழைநாடுகளில் திருமறையைப் போதித்தார் என்றும் பாரம்பரியம் கூறுகிறது. யூப்ரட்டீஸ் நதியின் அருகில் மரபு என்னுமிடத்தில் இவர் இறந்தார்.

 செப்.  27 புனித வின்சென்ட் தெ பால்

இவர் பிரான்சில் லாந்த் பகுதியில் பூயி என்னும் கிராமத்தில் 1581இல் பிறந்தார். பிரான்சிஸ்கன் குருக்களிடம் கல்வி பயின்று மறைப்பணியாளர் பட்டம் பெற்று பாரீஸ் நகரில் பணியாற்றினார். மறைப்பணியாளர்களைப் புனிதராக உருவாக்குவதற்கும், ஏழை எளியவர்களுக்கு உதவுவதற்கும் ஒரு மறைபோதகச் சபையையும் ஏற்படுத்தினார். இளம் பெண்களை கெடுக்கத் தேடிய இராணுவத்தினர் கையிலிருந்து காக்கும்படி, பலநூறு பெண்களுக்கு கன்னியர் மடங்களில் புகலிடம் கொடுத்தார். 1660 செப்டம்பர் 27 இல் பாரீஸ் நகரில் இவர் இறந்தார்.

 செப் . 30 புனித எரோணிமுஸ்

இவர் கி.பி 340 இல்  தால்மேசியாப் பகுதியில் ஸ்திரிதோ என்னுமிடத்தில் பிறந்தார். உரோமையில் இலக்கியக் கலைகள் கற்றுத் தேர்ந்தார். அங்கேயே திருமுழுக்குப் பெற்றார். தவ வாழ்வை மேற்கொண்டு கீழைநாடுகளுக்கு வந்து தமாசுஸ் என்னும் திருத்தந்தைக்குக் செயலராகப் பணியாற்றினார். அப்போது திருவிவிலிய நூல்களை இலத்தினீல் மொழியாக்கம் செய்யத் தொடங்கினார். துறவு வாழ்வை ஊக்குவித்து வளர்த்தார். பின்பு பெத்லகேமில் வாழ்ந்து கொண்டு திருச்சபையின் தேவைகளில் வியப்புக்குரிய முறையில் உதவிடலானார். பல நூல்கள், முக்கியமாக திருவிவிலிய விளக்கவுரை நூல்கள் எழுதினார். பெத்லகேமில் 420 இல் செப்டம்பர் 30 ஆம் நாள் இறந்தார்.