Pages - Menu

Showing posts with label Women Liberation. Show all posts
Showing posts with label Women Liberation. Show all posts

Friday, 29 September 2017

அமெரிக்கக் கடிதம், - சவரி - கேரி

அமெரிக்கக் கடிதம் 
- சவரி - கேரி

உங்கள் அனைவருக்கும் அன்னை மரியாவின் பிறந்த நாள் வாழ்த்துக்களை தெரிவித்துக் கொள்கிறேன். இந்த வாரம் உங்களுடன் பெண்கள் சுதந்திரத்தையும், பெண்களின் ஆளுமையைப் பற்றியும் பேச விரும்புகிறேன். சமீபத்தில் இங்கிலாந்தில் நடந்து முடிந்த பெண்களுக்கான கிரிக்கெட் உலக கோப்பை போட்டியில், நமது இந்திய பெண்கள் அணியினர் அபாரமாக விளையாடி நம்மையும், உலகத்தினர் அனைவரையும் மூக்கு மேல் விரல் வைக்க வைத்தார்கள். இறுதி ஆட்டத்தில் தோற்றாலும், இறுதி வரை போராடி, பார்ப்பவர்களை இருக்கையின் நுனிக்கு கொண்டு வந்து, அனைவர் பாராட்டுகளையும் பெற்றார்கள். அணியின் தலைவர் மித்தாலி ராஜ் ஆந்திராவில் குடியிருந்தாலும், அவர் ஒரு தமிழ் பெண் என்பது குறிப்பிட தக்கது. பெப்சி நிறுவனத்தின் தலைமை பதவி வகிக்கும் இந்திரா கிருஷ்ணமூர்த்தி ஒரு தமிழ் பெண் என்பதும் குறிப்பிட தக்கது. இவர் சென்னையில் பிறந்து, படித்து உலகில் தலை சிறந்த நிறுவனத்தின் தலைமையை பிடித்து, பல்வேறு நிறுவனங்களில் வேலை செய்யும் பெண்களுக்கு ஒரு முன்மாதிரியாகவும், வழிக்காட்டியாகவும், நம்பிக்கை நட்சத்திரமாகவும் விளங்குகிறார். ‘அடுப்பூதும் பெண்களுக்கு கல்வி எதற்கு?’ என்ற காலம் மாறி, தங்கள் கைகள் கரண்டியை மட்டும் பிடிக்க அல்ல, கணிணியையும், ராக்கெட்டையும் இயக்க தெரியும், கிரிக்கெட் மட்டையையும் பிடிக்க தெரியும் என்று உலகுக்கு நிரூபித்துள்ளார்கள்.

அமெரிக்காவில் பெண்கள் இல்லாத துறைகளே இல்லை. ஆண்களுக்கு நிகராக எல்லா துறைகளிலும் நுழைந்து  வெற்றி வாகை சூடி வருகிறார்கள். வேலை வாய்ப்புகளில் தகுதியானவர் யாராக இருந்தாலும் ஆண்/ பெண் வேறுபாடின்றி வேலை தரவேண்டும் என்று அமெரிக்க அரசு சட்டம் இயற்றியுள்ளது. இந்த சட்டம் அரசு நிறுவனங்களுக்கு மட்டுடல்லாமல், தனியார் நிறுவனங்களுக்கும் பொருந்தும். இதனால் நல்ல வேலை வாய்ப்பை பெற்று ஆண்களுக்கு நிகராக, பெண்கள் எல்லா துறைகளிலும் தலை சிறந்து விளங்குகிறார்கள். சமீப காலத்தில் ராணுவத்தில் தரையில் இறங்கி சண்டை போடும் கடின பணியிலும், அரசாங்கத்துடன் சண்டையிட்டு அனுமதி வாங்கி விட்டார்கள்.
திறமை உள்ள பெண்களின் திறமைகளை, பெண் என்ற காரணத்தால் புறக்கணிக்காமல், திறமைகளை வளர்த்துக் கொள்ள வசதிகளை ஏற்படுத்தி கொடுக்க வேண்டும். நம்மிடையே பல இந்திராக்களும், மித்தாலிகளும் உள்ளார்கள். அவர்களை சாதனை படைக்க வழி வகுக்க வேண்டியது நம் கடமை. பெண்கள் இன்னும் பல சாதனைகளை படைத்து உயர வாழ்த்துகிறேன்.

பட்டங்கள் ஆள்வதும் 
சட்டங்கள் செய்வதும்
பாரினிற் பெண்கள் நடத்தவந்தோம்.     
                                         -பாரதியார்.

Saturday, 23 September 2017

உலகை உயர்த்தும் பெண்மை

உலகை உயர்த்தும் பெண்மை

சகோ. விமலி FIHMஇதயா கல்லுVரி, குடந்தை

பெண்மை வாழ்கென்று
கூத்திடு வோடா !
பெண்மை வெல்கென்று
கூத்திடு வோடா !  
 - மகாகவி பாரதி

உங்களுக்கு எத்தனை குழந்தைகள்? மூன்று, மூன்றும் பொட்டைகள். எனக்கு தூக்கமே வரல. எப்படி இவைகளை கர சேர்க்கிறது? திருமணம், வரதட்சனை. எப்படி சமாளிக்க போகிறேனோ தெரியவில்லை. இது போன்ற சோகக்குரல்கள் நம்மிடையே ஒலித்துக் கொண்டுதான் உள்ளன.  
பெண்கள் ஆண்களோடு சமநிலையில் இருக்கும் இன்றைய காலகட்டத்தில் பெண்களைப் பற்றி தனித்து பேச வேண்டிய நிலை ஏற்பட்டுள்ளது.  ஆண்-பெண் இருவருமே இவ்வுலகிற்கு இன்றியமையாத வர்கள் ஒருவரிலிருந்து மற்றவர் தனித்து வாழ முடியாது. ஆனால் பெண்கள் நிலைமையானது மிக்க கவலைக்கிடமாக மாறி வருகிறது. ஒரு புறம் ய பண்கள் இன்றைய அறிவியல் சூழலுக்கு ஏற்ப ஆண்களைவிட பெண்கள் முன்னேற்றம் அதிகமாக உள்ளது. ஆனால் மறுபுறம் சமுதாயத்தில் பெண் குழந்தைகள் தன் இருப்புக்காகவும், உயிர்வாழ்வதற்காகவும் மிகவும் போராட வேண்டிய நிலைக்குத் தள்ளப்படுகிறார்கள்.

குடும்ப வன்முறை

குடும்பம் பெண் குழந்தைகளின் யாதார்த்தமான  உலகத்தைக் களவாடிவிடுகிறது. பெண் குழந்தைகளைப் பொறுத்தவரை அவர்களின் வளர்ப்பு முறையே அவளை ஓர் ஆணுக்கான பொருளாக தயாரிப்பதாகவே தொடர்கிறது. ஐந்து வயதிலேயே பலவிதமான பண்பாட்டு கட்டுப்பாடுகளை பெண் குழந்தைகள் மேல் சுமத்தப்படுகிறது.  ஏய் நீ விழுந்து கையை காலை உடைச்சுக்கிட்டா பிறகு எவண்டி உன்னைக் கட்ட வருவான்? என்ற இந்தக் குரலை கேட்டு வளராதவர்கள் எத்தனை  பேர்? கால் உடைந்து விடக் கூடாது  என்ற அக்கறை தேவையாகக் கூட இருக்கலாம். ஆனால் உன்னை கட்டிக்கொள்ள ஓர் ஆண் வாரவிட்டால் உன் கதி  என்ன என்ற கேள்வி பெண் குழந்தைகளின் மனதை நிரந்தர ஊனமாக்குகிறது. பால்ய விவாகம் என்ற சடங்கைதான் ஒழித்திருக்கிறோம். அந்தத் தத்துவத்தை இன்னும் வாழவைத்தக் கொண்டே இருக்கின்றோம்.

சமூக வன்முறை

சமூக அறமானது பெண் குழந்தைக்கு ஒன்றாகவும் ஆண் குழந்தைக்கு ஒன்றாகவும் அமைகின்றது. பெண்களைப் பொறுத்தவரை சமுதாயத்தின் அளவுகோல் வேறு. சட்டத்தின் அளவுகோல் வேறு. சமூக வன்முறையும் குடும்ப வன்முறையும் ஒன்றுடன் ஒன்று இணைந்து செயலாற்றுவதற்கு பாலியல் முரன்பாடுகளே முதன்மையானதாக உள்ளது. சமுதாயத்தில் பெண் குழந்தைகளுக்கு ஏற்படும் தத்துவ அறிஞர் சிமோன்திபவார் என்பவர் கூறுவது, ஆணாதிக்கம் நிறைந்த உலகில் பெண்களின் ஆளுமையும் மனநிலையும் உடைக்கப்பட்டு, சிதறடிக்கப்பட்டு வருகிறது. ஒழுக்கத்தையும் பண்பாட்டையும் கற்றுக்கொடுக்கும் ஆசிரியர்களே மாணவிகளை பாலியல் வன்கொடுமை செய்வதை நாளிதழ்களில் அன்றாட செய்தியாக பார்க்கின்றோம். மாணவியை ஆபாச வீடியோ எடுக்கும் அளவிற்கு நம் நாடு சீரழிந்துவிட்டது.

சட்டத்தின் வன்முறை

பெண்களுக்கென்றே பிரத்யேகச் சட்டங்கள் இருக்கின்றனவே என்று கேட்கலாம். ஆனால் இந்தச் சட்டங்கள் இயற்றப்பட்ட பிறகும் ஏன் பெண் குழந்தைகள் மீதான வன்முறைகள் குறையவில்லை? இறைச்சிக்காகப் பசுவைக் கொல்வதைச் தேச விரோத செயலாகக் கருதுகிறார்கள், பெண் குழந்தைகள் கூட்டுப் பாலியல் வன்புணர்வுக்கு ஆளாகிச் சிதைக்கப்படுகிறபோது எங்கே போகிறார்கள்? ஏனென்றால் சட்டங்களைவிட அவற்றில் மலிந்திருக்கிற ஓட்டைகள் குற்றவாளிகளுக்குச் சாதகமாகவும், பெண்களுக்குப் பாதகமாகவும் இருப்பதையும் மறுப்பதற்கில்லை.

வலியே வலிமையே தேவை
Feel the pain, Don't suffer என்று சொல்லும்போது,வலி என்பது வேறு, வல்லமை என்பது வேறு. ஒரு மரம் நன்றாக வளர்த்து  செழிப்பாக இருக்கும். ஆனால், வேகமாகக் காற்றடித்தாலும் அதற்கேற்ப வளைந்து கொடுத்துக்கொள்ளும். அதைப்போன்றுதான் பெண்களும் சூழ்நிலைக்கேற்பச் வலியையே வல்லமையாக மாற்றிச் செயல்பட வேண்டிய கட்டத்தில் இருக்கின்றார்கள்.    அதேநேரம் தங்களின் சுயத்தை நிலைநிறுத்திக்கொள்ள வேண்டும். இந்தச் சமூகத்தில் பெண்குழந்தைகளுக்கு எதிராக நடக்கும் சம்பவங்களால், அவர்கள் தாழ்ந்து போவதில்லை. அவர்களின் சுயமரியாதையை மேலும் விரிவடையச் செய்வதற்காக ஆழமாகப் பயணிக்கிறார்கள்.

பெண்கள் யானையைப் போன்றவர்கள். ஒரு யானையை அதற்கான எல்லை எது என்பதை அந்த யானைதான் முடிவு செய்யும். அதுபோல் பெண்களும் தங்களுக்கான எல்லைகளை அவர்கள்தான் முடிவு செய்ய வேண்டும். ஒரு கட்டத்துக்கு மேல் ஒரு வி­யத்தை தாங்கிக்கொள்ள முடியாது என்றால், பெண்கள் துணிந்து அதிலிருந்து வெளிவர வேண்டும். தன்னைப் பாதுகாத்துக்கொள்ளவும், தான் கண்டதை, கேட்டதை, நினைத்ததை அச்சமின்றிப் பகிர்ந்து கொள்ளவும், மனத்திண்மையுடன் விவேகமுள்ளவர்களாகச் செயல்பட பெண் குழந்தைகள் ஊக்குவிக்கப்பட வேண்டும். இந்தத் தேசத்தின் சுவாசமாக உள்ள பெண் குழந்தைகளின் சுதந்திரத்தை இவ்வுலகின் சுவாசக்காற்றாக மாற்றுவோம். வீட்டிலும் பள்ளியிலும் குழந்தைகளை முக்கியமாகப் பெண் குழந்தைகளை அச்சமற்றவர் களாக, ஆற்றல் மிக்கவர்களாக, உறுதியுள்ளவர்களாக வளர ஊக்கப்படுத்துதல் என்பதுதான் இன்றைய நிதர்சனமான உண்மை.

முடிவாக

  சமுதாயத்தில் நிலவும் பெண் குழந்தைகளின் வன்கொடுமைகளுக்கு காரணமாக அமைவது எது என்று ஆராயும்போது பாலினச் சமத்துவமின்மையே காரணமாக அமைகிறது. எனவே சமூகத்தின் அனைத்து பிரிவினருக்கும் பாலினம் தொடர்பான நீதியையும், சமத்துவப் பார்வையின் இன்றியமையாமையும் தெளிவாக விளக்க வேண்டும். பெண்களை வெளிப்படுத்தும் எந்த ஒரு நிகழ்வுகளும் பெண்மையைப் போற்றுவதாக அமைய வேண்டும். பால் அடையாளத்தின் பொருட்டு பெண் குழந்தைகள் இழந்துவிட்ட எண்ணற்றவைகளை அவளுக்கானதாக்க, கை மாற்றும் காலமாக இனி வரும் காலம் உண்டென ஓங்கி உரைத்திடுவோம். பெண்களுக்கு முன்னுரிமைக் கொடுத்த இறைமகன் இயேசுவைப்போன்று, ஆண், பெண் இருவருமே சுகமாக, மகிழ்வாக வாழ்வதுதான் நீதியானது என்பதைத் தற்போது சில நல்லூள்ளங்கள் உணர்ந்து செயல்படத் தொடங்கியுள்ளனர் என்பது வரவேற்கத்தக்கது. அந்த எண்ணிக்கை அதிகரிப்பது நம் ஒவ்வொருவர் கையிலும் இருக்கிறது.

பெண்மையே மனிதரை காக்கும் தெய்வம்
பெண்மையே மனிதரில் வாழும் தெய்வம்
பெண்மையே மனிதரை பேணும் தெய்வம்
பெண்மையே போற்றுவோம் !
        உண்மையை ஏற்ப்போம் !

Monday, 28 August 2017

எனக்கான சுதந்திரம் எதற்காக?

எனக்கான சுதந்திரம் எதற்காக?

குடந்தை  இதயா கல்லூரி மாணவிகளின் கருத்தோட்டம்

ஒருங்கிணைப்பு‡ அருட்சகோ. விமலி FIHM,

நீயே நீயாக வாழ இருக்கும் சூழல்தான் சுதந்திரம் என்கிறார், ஜிம்மோரிசன்.

சுதந்திர சூழலில்தான் உன்னத கலைகள் வெளிப்படும் என்கிறார், கிறிஸ்டோ.

சுதந்திரத்துடன் வரும் பொறுப்புணர்வை புரிந்து கொள்பவர்தான் உயர்ந்த மனிதராகிறார் என்கிறார் பாபு டைலன்.

மனிதரை உயர்த்தும் அவரின் மாண்பினைக் காக்கும் சுதந்திரம் நம் நாட்டில் எந்நிலையில் உள்ளது என  குடந்தை  இதயா கல்லூரி மாணவிகள் பகிர்ந்து கொள்கிறார்கள்.

மணிபுரியில் பெண்களின் இனிய சுதந்திரம்: (அழகுப்புஷ்பம், தமிழ் இலக்கியம் முதுகலை முதலாமாண்டு, அறந்தாங்கி)

      இமா (Ima) மணிப்புரி மொழியில் அம்மா என்று பொருள்: கெய்த்தல் (Kaithel) என்றால் சந்தை. நகரின் மையத்தில் அமைந்துள்ளது இமாசந்தை. பெண்கள் மட்டுமே அந்தச் சந்தையில் விற்பனையாளர்கள் (Sellers): நான்காயிரம் பெண்கள்! மதம், சாதி வித்தியாசமின்றி பெண்கள் இமா மார்க்கெட்டில் வணிகம் செய்ய மாநகராட்சி உரிமம் வழங்கியுள்ளது. உலகில் பெண்களே நடத்தும் ஒரேயயாரு சந்தை இது. சுற்றுலாப் பயணிகளின் தனிக் கவர்ச்சி இதுதான். மாநிலத்தின் வணிகப் பொருளாதாரத்தில் பெரும்பங்கு செலுத்துவதும் இதுதான். இந்த அங்காடி வளாகத்தில், கிடைக்கும் பொருட்களுக்கு கணக்கு இல்லை. காய்கள், கீரைகள், அரிசி, பயறுவகை, பருப்புவகை, இறைச்சி, மீன், கருவாடு உணவுப் பொருட்கள்: அனைத்து வகையான ஆடைகள், எண்ணெய், நாட்டு வாசனைத் திரவியங்கள் வரை வாழ்வுக்குத் தேவையான அத்தனையும் விற்கிறார்கள். கீழ்த்தட்டு, நடுத்தட்டு பெண்கள், கிராமப்புறப் பெண்டிரின் இமா மார்க்கெட் சம்பாதனையே குடும்பத்தைக் காக்கிறது. ஆணாதிக்க சமூகத்தில், மணிப்பூரில் பல குடும்பங்களில் பெண்கள் தீர்மானிக்கும் சக்தியாக உலவுகிறார்கள். அது அவர்களுக்கு ஒரு வாழ்வு முறை. இன்று நான் வாழும் இந்த தமிழகத்தில் இந்நிலை இருக்க வேண்டுமென்று என்னுகிறேன் இதுவே எனது சுதந்திர எண்ணங்களாகும். 

தாய்மொழி பெற வேண்டிய சுதந்திரம்:  (ஜெயப்பிரியா, ஆங்கிலம் இலக்கியம் முதுகலை இரண்டாமாண்டு,   ஜெயங்கொண்டம்)

  கற்றல் என்பது இன்று மிகவும் வடிவமயப்படுத்தப்பட்டிருக்கிறது. மதிப்பெண் பெறுவது, வெற்றியைப் பெறுவது, சான்றிதழ்கள் பெறுவது, உயர்கல்வி நிறுவனத்தில் இடம் பெறுவது, மேல்நாட்டுக்குச் செல்வது என்று வடிவமயப் படுத்தப்பட்டிருக்கிறது. கற்பதை அறிவாக மாற்றுவது எப்படி? படிப்பில்லாத மக்களுக்குப் படிப்பில்லாத போதும் பிரச்சினை: படிப்பு கிடைக்கையிலும் பிரச்சினை. நவீன படிப்பு என்பது பற்றி நாம் போதிய முறையில் சிந்திக்கவில்லை. நவீனக் கல்வி என்பது பண்பாட்டோடு இணைக்கப்படவில்லை. தமிழ் என்று ஒரு இலக்கியம் இருக்கிறது என்று  தமிழருக்கு புரியவில்லை. நவீன கல்வியானது அடிப்படையிலேயே தமிழ் மக்களின் பண்பாட்டிலிருந்து பிறந்ததாக அமையவில்லை. இதை மாற்றும் சுதந்திரம் இன்று இந்தியாவிற்குத் தேவை. இதுவே எனது விருப்பம். 

  கற்றலில் சுதந்திர சூழல்: (நா.ராஜேஸ்வரி, தமிழ் இலக்கியம் முதுகலை இரண்டாமாண்டு, கும்பகோணம்)
 
உண்மை அறிவு என்பது மேல் தோற்றத்தை உண்மை என்று ஏற்காது. அது கண்ணுக்குத் தெரியா ஆழங்களில் துண்டு துணுக்காய் இருக்கும் அறிவை ஒன்றிணைத்து காணும் வல்லமை பெற்றதாகும். அறிவியல் மற்றும் தொழில்நுட்பம் வளர்ச்சி தரத்திற்கேற்ப, சமூகம் சார்ந்த சிந்தனைகளுடன் இரண்டறக் கலக்கையில், நம் சமூகத்தின்  சமத்துவமின்மை, தீண்டாமை, திரைப்பட நடிகர் வழிபாடு, தலைவர் வழிபாடு, தமிழகக் கட்சிகளில் நிரந்தரத் தலைவர்கள் என்ற போக்கு போன்ற விமர்சிக்கப்படும். விமர்சன அறிவு (ளீrஷ்மிஷ்உழியி சிஐஆற்ஷ்rதீ) என்பது உலகம் எங்கும் போற்றிப் பாதுகாக்கப்படும் அறிவுமுறையாகும். மாணவர்கள் இயற்கையாய் வாழும்போது வாழ்வின் முழுப் பரிமாணம் வளரும். இந்த நிலை இன்றைய கல்வி திட்டத்தின் நிலையாக இயங்கி வளரவேண்டும். இதை அரசே முன்னின்று செய்ய வேண்டும் என்பதே எனது மக்களின் கல்விக்கான சுதந்திரமாக நான் எண்ணுகிறேன். 

சுதந்திரத்தால் முன்னேற்றம்: (நா.ராஜேஸ்வரி, தமிழ் இலக்கியம் முதுகலை இரண்டாமாண்டு, கும்பகோணம்)

உறுதியோடு உறவாடும் உன்னதமான உயிரான சுதந்திரமே! என் கனா காணும் வினாக்களுக்கு விடையாக நீ இரு! வலியச் சென்று தேடும் பொருள்கள் தொலைவில் இல்லை! வலியோடு தேடும் பொருள்களும் தொலைவதில்லை! யாரையும் சார்ந்து நில்லாமல், காரணங்களைத் தேடாமல், எடுப்பார் கை பிள்ளையாக இராமல், சூழ்நிலைக் கைதியாகச் சிறைபடாமல், கைகட்டி சேவகம் செய்யாமல், கூழைக் கும்பிடு போடாமல், தடைகளினால் தடம் புறளாமல், வீண் பெருமையில் மூழ்கிப் போகாமல், பணிகளை வாய்ப்புகளை நழுவ விடாமல், அற்ப மானிடர் முன் தலைகுனியாமல் வாழும் வாழ்வு தேவை! இத்தகைய வாழ்வு இத்தரணிக்கு நிரந்திடமாகிட தகுதி, திறன், தரம் நிரந்தரமானால், தரணியில் இனிய தாரகை புனிதமான சுதந்திரத்திற்கு தொடர் முயற்சியோடு கை கோர்த்தால் முன்னேற்ற ஏறுமுகமாக இருக்கும் என்பதே என் ஆசை. 

பெண்களின் சுதந்திரம்: (கி.சந்தியா, வயது 19, வேப்பத்தூர்)

  இந்த தேசத்தின் சுவாசமாக உள்ள பெண் குழந்தைகளின் சுதந்திரத்தை ஆற்றல்மிக்கவர்களாக உறுதியுள்ளவர்களாக வளர ஊக்கப்படுத்த வேண்டும். பெரும்பாலான பெண்கள் தங்களின் திறமைகளை, தனித்துவத்தை, தன்மானத்தை, சுயமரியாதையைக் கெளரவத்தை திருமணம்,குடும்பம், குழந்தைகளுக் ‡காகத் தியாகம் செய்து விடுகிறார்கள். அதற்காகப் பெருமைப்பட்டுக் கொள்ளவும் செய்கிறார்கள். ஆண், பெண் இருவருமே  சுகமாக மகிழ்வாக வாழ்வதுதான் நீதியானது என்பதைத் தற்போது சிலர் உணர்ந்து செயல்படத் தொடங்கியுள்ளனர் என்பது வரவேற்கத்தக்கது. இந்த எண்ணிக்கை அதிகரிப்பது நம் ஒவ்வொருவர் கையிலும் இருக்கிறது. 

சமத்துவ சுதந்திரம்: (பா.துர்கா லெஷ்மி,  முதுகலை இரண்டாமாண்டு கணிதம், ஆடுதுறை)

  ஆணுக்கும் பெண்ணுக்கும் கற்பைப் பொதுவில் வைக்கச் சொன்னார் பாரதி. நாமோ கவுரவம் என்கிற ஒரு வார்த்தையைப் பெண்ணின் தோளேற்றி இந்த நூற்றாண்டிலும் அவளைச் சுமக்கவைத்துக் கொண்டிருக்கிறோம். தனக்கான மணத்தேர்வைச் செய்வதற்கும், அதன் அடிப்படையில் வாழ்வதற்கும் இயலாத நிலையில் இருக்கும் பெண்ணின் இடம் எத்தனை கொடுமையானது. பால் அடையாளத்தின் பொருட்டு பெண் இழந்துவிட்ட எண்ணற்ற வி­யங்களை அவளுக்கானதாகக் கை மாற்றும் காலமாக இனிவரும் காலம் இருக்கட்டும். ஆணும் பெண்ணுமே இந்த வாழ்வை, குடும்ப அமைப்பின் விழுமியங்களாக, தோளில் ஏற்றவோ, அல்லது உதறித் தள்ளவோ இணையட்டும். இந்த வாழ்வென்பது வாழ்ந்து கடக்கவே, வன்முறையினால் வீழ்ந்து கிடக்க அல்ல. 

ஆ.ஸ்டேசி தெபோரா, முதுகலை இரண்டாமாண்டு கணிதம், திருவையாறு.

  ஆண், பெண் இருவரும் உடலினால் மாறுபட்டவர்களே அன்றி உணர்வுகளினால் ஒன்றுபட்டவர்கள் என்பதைச் சிறுவயதிலேயே புரியவைத்துவிட வேண்டும். இருவரின் உணர்வுகளும் மதிக்கப்பட வேண்டும். இதற்கான முயற்சிகளை நம் வீடுகளிலிருந்தே ஆரம்பிக்க வேண்டும். எத்தனை யுகங்கள் ஆனாலும் பெண்கள் தியாகியாகவே இருக்க வேண்டும் என்பதை மறுபரீசிலனை செய்ய வேண்டும். பெரும்பாலான ஆண்களால் பெண்களின் துணிவை, முன்னேற்றத்தை, சதுரியத்தைத், திறமையைப் பொறுத்துக் கொள்ள முடிவதில்லை. ஆண், பெண்ணை அடக்க நினைக்காமல், அன்புகூர்ந்து, அரவணைத்து வாழும் இல்லறம்தான் இன்பம் பொங்கும் நல்லறம். இதுவே நம் நாட்டின் சுதந்திரம். 

 கி.கவிதா, முதுகலை இரண்டாமாண்டு, ஆடுதுறை.

உரிமைகள் சுதந்திரங்கள், பாதுகாப்பு அனைத்திற்கும், ஆணைப்போன்று பெண்ணுக்கும், அனைத்து வகையிலும் சமத்துவம், சுதந்திரம் அளிக்கப்பட வேண்டும் என்ற ஐ.நா. சபையின் அறிவிப்பும் வழிகாட்டுதலும் (பிரிவு‡3) வழங்கப்பட்டு 68 ஆண்டுகள் கழிந்துவிட்டன. அதற்குப் பின், அதை அடியயாற்றி உருவாக்கப்பட்ட இந்திய அரசியலமைப்புச் சட்டத்தின் 14 முதல் 18 வரையிலான பிரிவுகள் இருபாலாருக்குமான சுதந்திரத்துவ உரிமைகளைப் பற்றி அறுதியிட்டுக் கூறியுள்ளது. இந்திய ஜனநாயகத்தின் அடிப்படையாக அமைவது சமத்துவம். இதுதான் நமது அரசியலமைப்புச் சட்டத்தின் அடிப்படைக் கூறாகவும் அமைகிறது. 
 
இன்று மேலே குறிப்பிட்டுள்ள ஒரு சில உண்மைகளைக் கண்திறந்து பார்க்கவேண்டிய கட்டாயத்தில் இருக்கின்றோம். நான் நானாக பொறுப்புடன் வளர்வதற்கு ஏற்ற சூழல் நம் நாட்டில் நிறையவே வளர வேண்டும். சமய சுதந்திரத்தை வேரருக்கும் செயலை, மத்திய அரசு மிக தீவிரமாக செய்து வருகிறது. இதில் பேச்சு சுதந்திரம், எழுத்து சுதந்திரம் புதைக்கப்படுகிறது. இன்னும் வேண்டிய சமவாய்ப்பு நிலைகளை அழித்து வருகிறது. நான் மட்டும் நன்றாய் இருந்தால் போதும் என்ற எண்ணம் தான் ஊழலின் அடிப்படை இருட்டு.
மேல் நாடுகள் சுதந்திர சூழலில் மக்கள் வாழ வழிசெய்கிறது. மக்கள் வளர, இதனால் நாடு வளர்கிறது. நம் நாடும் வளரும் நாடு என்ற வரிசையில் நிற்கையில், சுதந்திர உயிர்நிலத்தை நாட்டில் உலவ செய்து மனிதரை, நாட்டை வளர செய்வோம்...
     

Sunday, 26 February 2017

பெண்கள் சாதனையின் கண்கள்

பெண்கள் சாதனையின் கண்கள்

அருட்சகோ. முனைவர். விமலி. FIHM
தமிழ்த்துறைப் பேராசிரியர், இதயா மகளிர் கல்லூரி, கும்பகோணம்

“நிலவினில் இருக்கின்ற
களங்கத்தை அவளது
பெருவிரல் துடைத்துவிடும்
புதுயுக மகள் இவள்
அணிகின்ற வளையல்கள்
சிறைகளை உடைத்துவிடும்”

என்ற வைரமுத்துவின் கவிதை வரிகளுக்குகொப்ப பெண்ணுக்கு அரை நூற்றாண்டுக்கு முன்னால் கல்வி வாய்ப்பு அத்தனை எளிதல்ல. “பேதமை” அறிவின்மை பெண்ணுக்கு அழகு என கருதப்பட்டது. மெல்ல மெல்ல, ‘பால் கணக்கு கடிதம் எழுதத் தெரிந்தால் நல்லது’ என்று ஆரம்பக் கல்வி, பின்பு பதின்பருவம் அடையும்வரை படிக்க அனுப்புவது, பின்பு உள்ளூரில் உள்ள பள்ளியில் எந்த வகுப்பு வரை உள்ளதோ அதுவரை படிக்க அனுப்புவது என்ற நிலைகள் மாறி, பிறகு சில சேவைத் துறைசார் படிப்புகளுக்கு அனுப்பப்பட்டனர். தொழில்நுட்பம், பொருளாதாரம், அரசியல், பாதுகாப்புத் துறைகள் அவர்களுக்கு மிக அன்னியமான துறைகளாயின. ஆணுக்கு நிகரான சமூக அந்தஸ்து  போன்றவற்றிற்காகப். பெண்கள் போராடும் நிலைக்குத் தள்ளப்பட்டனர், வரதட்சணை, பெண் சிசுக்கொலை, பாலியல் பலாத்காரம், கடத்துதல் போன்ற கொடூரத்திற்கு ஆளாகி  உடலாலும், உள்ளத்தாலும் பாதிப்படைந்து அவர்கள் முன்னேற்றத்தைத் தடுப்பதாக அமைந்தது. இருப்பினும் பெண்கள் என்றுமே வாழ்க்கைக் கூறில் ஒரு பாதியாக விளங்குபவர்கள். காலத்தாலும், சூழ்நிலையாலும் அன்றும்,  இன்றும் ஒரு சில தடைகள் வந்தாலும், அவர்கள் வளர்ச்சி படிகளில் முன்னேறியே வருகின்றனர். குடும்பத்திலும், சமுதாயத்திலும் பெண்கள் இன்றி முன்னேற்றம் காண முடியாது என்பதுதான் எதார்த்தம். இத்தகு நனி சிறந்த ஆற்றல் சால் மகளிரை மாண்புறச் செய்வதையே இக்கட்டுரை ஆய்ந்துள்ளது.

ஒளி படைத்த கண்ணினாய் வா வா வா
உறுதி கொண்ட நெஞ்சினாய் வா வா வா 
என்று பாடினார் பாரதி.

‘உரிமைகள் மறுக்கப்படும்போது, உணர்வுகள் புரிந்து கொள்ளப்படாத போது, சுதந்திரம் மதிக்கப்படாத போது, நீதி நிராகரிக்கப்படும்போது, வெற்றியின் அனுபவங்கள் ஏராளம் என்று இயல்பாக்கிக் கொள்ளுங்கள். அப்போது உங்களுக்கான  உலகத்தை  உரிமையாக்கி  உயரலாம்’ என்ற ஸ்பார்டகஸ் என்பவரின் வீரவாக்கிற்கேற்ப கடந்த இருபது ஆண்டுகளில் ஏராளமான மாற்றங்கள் பெண்களின் வாழ்வில் நிகழ்ந்துள்ளன. அதில் சாதனைகளுக்கும், விருதுகளுக்கும் சொந்தக்காரப் பெண்களின் சில ஆளுமையை இவ்வண் நோக்குவோம்.
இலட்சியத்தை அடைய தோல்வியும் வெற்றியே!

படிக்க வசதியில்லை என்பதால், பள்ளி, கல்லூரிகளுக்குப் போக முடியாமல் தவிக்கிற பெண்களுக்கு மத்தியில் நம்பிக்கை தருகிறார் பாண்டீஸ்வரி. மதுரை, வில்லாபும் பராசக்தி நகரைச் சேர்ந்தவர். தன்னை மிரட்டிய குடும்ப வறுமையை எதிர்த்து நின்று வென்றிருக்கிறார். மாலை நேரங்களில் மதுரை கீழ மாசி வீதிக்குச் சென்றால் அவரை பஜ்ஜியும் கையுமாகப் பிடித்துவிடலாம். தள்ளுவண்டி கடையில் பலகார வியாபாரத்தை நடத்தி, அதன் மூலம் வருமானத்தில் எம்.பி.ஏ. படித்துக் கொண்டிருக்கிறார். வருங்காலத்தில் ஐ.ஏ.எஸ் ஆவதே எனது கனவு என்கிறார். 

தினம் பத்துப் பக்கம் வாசிப்பதற்கே யோசிக்கிறவர்களுக்கு மத்தியில், தனித்த கவனம் ஈர்க்கிறார் லோகாம்மாள். இவர் மாதம் ஒரு புத்தகம் எழுதுவது என்ற கொள்கையுடன் செயல்Vபட்டு வருகிறார். கடந்த 29 மாதங்களில் 23 புத்தகங்களை எழுதியிருக்கிறார்.

தேசிய சாதனை படைத்த பூங்கோதை :

நம் நாட்டில் பெரும்பாலான மக்கள் கிராமங்களில் வாழ்கிறார்கள். நாட்டின் முதுகெலும்பான கிராமங்களின் ஆதாரத் தொழிலான விவசாயம் அழிவை நோக்கிச் சென்றுகொண்டிருக்கிறது. நாடு முழுவதும் நடக்கும் விவசாயிகளின் தற்கொலைகளும் இதைத்தான் நிரூபிக்கின்றன. இப்படியயாரு கசப்பான சூழலில் பெரம்பலூரைச் சேர்ந்த 60 வயது பூங்கோதை, தானியங்கள் உற்பத்தியில் தேசிய சாதனை புரிந்து, வயல்தான் வாழ்க்கை என்ற நம்பிக்கை அளித்துவருகிறார்.

ஜெயிக்க  வைத்த  சணல் :

‘பிளாஸ்டிக் பயன்பாட்டைக் குறைக்க வேண்டும்’ என்ற சிந்தனை தற்போது அதிகரித்து வருகிறது. சென்னையைச் சேர்ந்த ஜெசி தனது கடின உழைப்பால் தமிழகத்தில் சணல் பொருட்கள் உற்பத்தியாளர்களில் குறிப்பிடத் தக்கவராக மாறியிருக்கிறார்.

இளம் வயதில் கணவரை இழந்தவர் திருமதி. பாரதி, 32, கணவரால் கைவிடப்பட்டவர் திருமதி. யஹலன்மேரி, 45. இருவரும் தனது கடின உழைப்பால் உயர்ந்து, இன்று ஆட்டோ வாங்கி ஓட்டுநர்களாக அவர்களே சுய தொழில் செய்து, தமது வாழ்வில் உயர்ந்து வாழ்ந்து வருகிறார்கள். இவ்வாறு  சாதனையாளர்களின் பட்டியல் இன்று எல்லாத் துறைகளிலும் கனிசமான தளத்தை அடைந்துள்ளது. இன்றைய பெண்கள் மிகவும் திறமைசாலிகள். எதையும் எளிதில் புரிந்துகொள்ளும் திறமைப் படைத்தவர்கள். புதியனவற்றைக் கற்றுக்கொள்ளும் ஈடுபாடு கொண்டவர்கள். அவர்களின் ஆற்றல் அளப்பரியது  என்பதை  நம்புவோம்.

விண்ணைத் தொட்ட கனவு : 

தென்னாப்பிரிக்காவில் சராசரிக் குடும்பத்தின் குழந்தையாகப் பிறந்து வளர்ந்தவர் ´போங்கீலி சம்போ, விமானப் பணிப் பெண்ணாக ஆக வேண்டும் என்று விரும்பியவர். உயரம் போதாது என்று ஒதுக்கப்பட்டார். அந்த நிராகரிப்பை அவர் தோல்வியாகக் கருதவில்லை. மகத்தான மற்றொரு வாய்ப்பு தனக்குக் காத்திருப்பதாகவே அவர் நம்பினார். அந்த நம்பிக்கையும் அதற்கான முயற்சிகளும் அவரைத் தொடர்ந்து வழிநடத்தின. விமானப் பணி பெண்ணாகத் தேர்வாகாதவர், சில ஆண்டுகளிலேயே, விமான சேவையை ஆரம்பித்த முதல் ஆப்பிரிக்கப் பெண் என்ற சாதனையைப் படைத்தார்.

ஹாரிபாட்டர் பல புத்தகங்களை எழுதியவர், ஜே.கே.ரவுலிங் JK Rowling) என்னும் ஒரு பெண்மணி. அவர் ஹார்வர்ட் பல்கலைக்கழகத்தில், “ The Frimge Benefits of Failure”  என்ற தலைப்பில் பேசிய உரை மிகவும் பிரபலமானது. அது புத்தகமாகவும் வெளியானது. ‘நீங்கள் உங்களது மனவலிமை பற்றியும், மனவுறுதி பற்றியும் அறியத், தோல்வியை விட சரியான சோதனை வேறென்ன இருக்க முடியும்? நீங்கள் எப்போது பின்னடைவுகளிலிருந்து மேலும் வலிமையுடனும், திறமையுடனும் எழுதுகிறீர்களோ, அப்போது  உங்களின் வாழ்க்கை தானாக வெற்றியடையும். எனவே தோல்விகளுக்குப் பிறகு கிடைக்கும் வலி மிகுந்த வெற்றியே,  உண்மையான வெற்றி. நாம் எங்கும் கற்க முடியாததை, தோல்வியே நமக்குக் கற்றுத் தரும். ஆகவே தோல்வியை பலவீனமாக கருதாமல், பலமாய் கருதினால், நமக்கு நன்மைகளே கிட்டும்’ என்கிறார்.

கனவுகள் மெய்ப்படும் காலம் :

திருமணம் என்ற இலக்கைக் கடந்து பெண்கள் தங்களுக்கான கனவுகளைக் காண வேண்டும். அதை நோக்கிய திட்டமிடலும் தொடர் பயணமும் வேண்டும். சாதனை பெண்களை முன்மாதிரிகளாகக் கொள்ள வேண்டும். தன்னை அலங்கரித்து, தொலைக்காட்சியில் தொலைத்து, இலட்சியமின்றி வாழும் வாழ்வுக்கு முடிவு காண வேண்டும். நாட்டில் சரிப்பாதி பெண்ணினம்  முடங்கிக் கிடந்தால், நாட்டின் முன்னேற்றம், பெண்ணை உயர்த்துவதோடு, ஒரு சமூகத்தை, ஒரு நாட்டை நிச்சயம் உயர்த்தும். பெண்களே! உங்களுக்கான கனவுகளை நீங்களே காணுங்கள். அது மெய்ப்படப் பயணம் செய்யுங்கள்.

(இக்கட்டுரை எழுதும் ஆசிரியர் மேற்கண்ட தகவல்கள், தகவலாளரிடம் பேட்டி மற்றும் தொலைப்பேசி வழி சேகரிக்கப்பட்டது).

Saturday, 25 February 2017

பெண்மையைப் போற்றுவோம்

பெண்மையைப் போற்றுவோம்

உலகில் உயர்ந்த உயிரினமாகிய மனிதர், உலகில் உதிப்பது தாய்மையினால்தான். மனித பிறப்பிலும், அவர்களின் வளர்ப்பிலும் உண்டாகும் பாரங்கள், துன்பங்களையயல்லாம் வரவேற்று மகிழ்வது தாய்மை. உலகை உண்டாக்கினார் இறைவன், என்று தொடக்க நூலில் படிக்கிறோம். படைப்புகளின் உச்சமாகிய மனிதரை இன்றும் நிதர்சனமாக உருவாக்கி தருபவர்கள் பெண்கள்.

மார்ச் மாதம் 8ஆம் நாள் மகளிர் நாள் என்று சிறப்பிக்கப்படுகிறது. மனிதர் பெண்களின் அருமையையும், பெருமையையும்  உணர்ந்து அவர்களின் மாண்புடன் இணைந்து வாழ அழைக்கிறது  இந்நாள்.

பெண்கள் அழகின் நிழல், உணர்வுகளின் உள்ளுணர்வு, உறுதியின் இருப்பிடம், இளகிய மனதின் ஓடை, தாய்மையின் தெய்வ நிலையில் நிற்கும் பெண்களிடைமே காதல் என்ற தேனருவி தோன்றி கவர்ச்சியில் மனிதரை மயங்க வைக்கிறது. எனவேதான் திரைபட பாடல்கள், காதல் மோகத்தையே மையமாக வைத்து வடிக்கப்படுகின்றன. பெண்களின் மயங்கும் அழகை ஒரு கவிஞர் இப்படி வர்ணிக்கிறார்.
‘நீயா பேசியது, என் அன்பே,
தீயா வீசியது’
‘ஊருக்குள் வெளிச்சமெல்லாம்
உன் கண்களை திறப்பதனால்
பூவுக்குள் பனித்துளிகள்
உன் முகத்தினை கழுவுவதினால்’

இந்த  உடல் அழகு, மாறிவிடும். இளமை மறைந்தவுடன் அழகும் மாறி மறைந்துவிடும். ஆனால் பெண்மையில் மறைந்திருக்கும் மாண்புகள் தொடர்ந்து நிற்கும். 

கிரிஸ் என்பவர் கூறுவார், ‘பெண்களுக்கு தேவையானவை மூன்று : உணவு, நீர், பாராட்டு’ என்பார். ஆஸ்கார் வில்த என்பவர் கூறுகிறார், ‘பெண்கள் அன்பு செய்யப்பட வேண்டும். அவர்களை புரிந்துக் கொள்ள முயற்சிப்பது  தேவையில்லாதது’ என்கிறார்.
 
ஆண் - பெண் உறவு இனிது. ஆண், பெண் ஆகியோரின் தனித்தன்மைகளை நாம் ஏற்றுக் கொள்ள வேண்டும். உணர்வலைகளின் கொதிகலன்கள் பெண்கள். ஆண்களின் அறிவு கூட்டலில், பெண்களின் உணர்வுகளை புரிந்துக் கொள்ள தவறி விடுகின்றனர். மறைந்த இங்கிலாந்து பிரதமர், இரும்பு பெண்மணி என்று அழைக்கப்பட்ட மார்கிரேட் தாட்சர் கூறுவார், அரசியலில் ஒரு கருத்து சொல்லப்பட வேண்டுமென்றால், ஓர் ஆணிடம்  சொல்லுங்கள். ஏதாவது செய்யப்பட வேண்டுமென்றால் ஒரு பெண்ணிடம் சொல் என்கிறார்.

இந்நாள்களில் பெண்களுக்கு எதிராக பல கொடுமைகள் நடைபெறுகின்றன. கற்பழிப்பு, கொலை, பெண் சிசு கொலை, வரதட்சணை, குடும்பத்தில் கொடுமைகள் ஆகியவை பெண்மையை தாழ்வுபடுத்துகின்றன. தாய்மையின் உயர்வை கொண்டாடி போற்ற இத்திங்கள் நம்மை அழைக்கிறது. 

ஒரு கவிதையில் இவ்வாறு சொல்லப் பட்டிருக்கிறது. ‘அம்மா... அன்று நம் தொப்புள் கொடியை அறுத்தது நம் உறவை பிரிக்க அல்ல. அது நம் பாசத்தின் தொடக்கத்திற்கு வெட்டப்பட்ட ரிப்பன்’.  நம்மிடையே  உலவிவரும் தெய்வ நிழலான தாய்மையை, பெண்மையை போற்றி வளர்வோம்.

இம்மாதத்தில் நொடிக்கு நொடி அரசியல் நிகழ்ச்சிகள் வெடியாக வெடித்தன. முன்னாள் முதல்வர் ஓ. பன்னீர்செல்வம் பதவி துறந்தது, தான் மிரட்டப்பட்டதாக துணிவுடன் வெளியிட்டு, திருமதி.  சசிகலாவிற்கு எதிராக போர்கொடி உயர்த்தியது, சட்டமன்ற உறுப்பினர்கள் ஆடம்பர விடுதிகளில் அடைக்க வைக்கப்பட்டிருந்தது, திருமதி. சசிகலா, சொத்து குவிப்பு வழக்கில், இருபது வருடங்களாக இழுக்கடிக்கப்பட்ட வழக்கு முடிவுக்கு வந்து, அவர்கள் குற்றவாளி என்று அறிவிக்கப்பட்டு சிறையில் அடைக்கப்பட்டது.

சட்டசபையில் பெரிய அமலிகளுக்கிடை யில் திரு.எடப்பாடி பழனிச்சாமி முதலமைச்சர் ஆனவை எல்லாம், தமிழ்நாடு அரசியலில் இன்னும் நாகரிக முதிர்ச்சி பெறவில்லை என்றுதான் சொல்கின்றன. தெய்வமாக போற்றபெற்ற முன்னாள் முதல்அமைச்சர் செல்வி. ஜெயலலிதா, வருமானத்திற்கு அதிகமாக சொத்து சேர்த்ததில் முதல் குற்றவாளி என்று நூறு கோடி ரூபாய் தண்டனையும், அவர்களுடைய சொத்துக்கள் அரசுடைமையாக்கப்பட்டும் உள்ளன. மக்களின் பணத்தை அரசியல் தலைவர்கள் சூரையாடி வருகிறார்கள் என்பது அப்பட்டமாகியிருக்கிறது. ஜல்லிக்கட்டுக்காக மாணவர்களிடம் வெடித்த புரட்சியை போல் தமிழ்நாட்டில் நிலவும் அரசியல் அவலங்களை அகற்றவும் மற்றொரு எழுச்சி தோன்ற வேண்டும்.

Monday, 7 December 2015

“விளிம்பு நிலை மனிதம்”

“விளிம்பு நிலை மனிதம்”

எஸ். ஜோசப், திருச்சி.

1. சட்டங்களும், சம்பிரதாயங்களும் :
சட்டங்களும், சம்பிரதாயங்களும் இச்சமூகத்தை கண்காணிக்கின்றன. ஆனால் தனிப்பட்ட இதயத்தின் நெளிவு வளைவுகளை அவைகள் கண் எடுத்தும் பார்ப்பதில்லை. காரணம் சமூக நீதியை பொருத்த அளவில் ஒருவன் எத்தகைய கண்ணோட்டத்துடன் இருக்கிறான் என்பதற்கு உரசிப் பார்க்க சரியான உரை கல்லை இச்சமூகம் பெறவில்லை என்பது தான் உண்மை.

2. சமூகப் பார்வையும், திரு அவையின் பார்வையும் :
ஆணையும், பெண்ணையும் பிரித்து இருவகை பாலினமாக வகைப்படுத்திய நமது சமூகம் பின் தங்கியவர்கள், தலித்துகள், பெண்கள் மற்றும் குற்றப்பரம்பரையினர் போன்றவர்களை கூட அடையாளம் கண்டு ஒரு நிகழ்கால  பார்வையில் சிறிதளவேனும் சிந்தித்து மறுபரிசீலனை செய்யவும் முன் வந்துள்ளது. இச்சமூகப் பார்வையினை நமது “திருஅவையும்” மேற்கொண்டு வருவது அத்தகையவர்களை மனிதர்களாக ஏற்றுக் கொண்டு ஆதரவு அளிப்பது மறுக்க முடியாத உண்மை. ஆம். வருணாசிரமம் தாக்குதலுக்கு ஆளாகும் இச்சமூகத்தினை மனிதர்களாக ஏற்றுக் கொண்டு நமது திருஅவையும் இயங்குவது சற்று ஆறுதலான, ஏற்புடைய செயல்தான். ஆனால் மூள்றாவது பாலினமாக அரவாணிகளை நாம் கண்ணெடுத்தும் பார்ப்பது இல்லை. கடந்த 6 ஆண்டுகளாக நான் சென்னைக்கு மேற்கொள்ளும் ரயில் பயணத்தில் விழுப்புரம் சந்திப்பில் கிடைத்த 10 நிமிட இடைவெளியில் பல அரவாணிகளைப் பார்த்து அவர்களது நிலையினை அறிந்துள்ளேன். அதில் கிடைத்த தகவல்கள் எனக்கொரு தாக்கத்தை கொடுத்தது. இவர்களைப் பற்றி நான் சேகரித்த விபரங்களை, படித்தறிந்த உண்மைகளின் வெளிப்பாடுகளே, இந்த கட்டுரை.

3. அகதிகளான  சமூகத் தீவுகள் :
நம்மிடையே தங்கள் வாழ்க்கையினையே ஒரு போராட்டமாகக் கொண்டு உயிர் இருந்தும் செத்து மடியும் ஒரு சமூகத்தை அடையாளம் காணவேண்டியது நமது கடமையாகும். ஆம், “விளிம்பு நிலையில்” போராடி வாழும் அந்த மனித கூட்டம் ஆண் என்று இல்லாமலும் பெண் என்று இல்லாமலும் நம்மிடையே உலாவரும் அரவாணி சகோதர்களே (சகோதரிகளே). ஆணையும், பெண்ணையும் வகைப்படுத்தி புரிந்துள்ள இச்சமூகம் அரவாணிகளை துளி அளவும் புரிந்துக் கொள்ளவில்லை. இத்தகு தவறான பார்வையையும் புரிதல்களையும் மட்டுமே இச்சமூகம் கொண்டுள்ளது. எனவே சமூகப் பார்வையில் இவர்கள் தனித் தீவுகளாகவே உள்ளனர்.

4. குடும்ப உறவில் அன்னியம் :
குடும்பத்தில் ஆணாக பிறந்தவர்கள் சிறுவயது முதலே ஆணுமின்றி பெண்ணுமின்றி பால் நிலை திரிந்தவர்களாக இருப்பவர்களே அரவாணிகளாகின்றனர். உடலில் ஆணாகவும், உணர்வில் பெண்ணாகவும் தங்களை ஆட்படுத்தியவர்கள் தான் இந்த அரவாணிகள். அவர்களது உடலியலும், உளவியலும் வாழ்வியலைப் பாதிக்கும் அம்சங்களுடன் வாழ்கிறபோது ஒரு நிலையில் தங்கள் குடும்பத்தில் தன்னை பெற்றவர்கள், உடன் பிறந்தவர்களால் ஒதுக்கி அடித்து துரத்தப்பட்ட பல அகதிகள் இன்று அரவாணிகளாக ஆக்கப்பட்டவர்களே என்பது வருந்ததக்கது ஆகும். குடும்ப உறவுகள் இவர்களை வேண்டாத சாதியாக வெறுத்து ஒதுக்குவது கொடுமையிலும் கொடுமை.

5. சமூக உறவில் அன்னியம் :
சமூகத்தில் அவமானப் பிறவிகளாகவும் கீழ்மைப்படுத்தப்பட்ட விளிம்புநிலை பிறவிகளாகவும் இந்த அரவாணிகள் மதிக்கப்படுகிறார்கள். அவர்களை குற்றப்படுத்தி காயப்படுத்தும் வக்கிர பார்வையினை இச்சமூகம் கொண்டுள்ளது. இவர்களை ஒன்பது என்றும் அலிப்பசங்க என்றும் கூறி இதயத்தை கீறிப்பார்க்க இச்சமூகம் தவறவில்லை. ஊடகங்களில் வக்கிரப் பார்வை உடையவர்களாகவும், காமடியன்களாகவும், மாமா வேலை பார்க்கும் பாலியல் முகவர்களாகவும் காட்டி காயப்படுத்தும் கொடூரத்தை யார் கேள்வி கேட்பது? ஒரு கணம் சிந்திப்போம்.

6. கை கொடுக்கும் கையும், மெய்யும் :
இப்படி தீவுகளான இந்த நாடோடி சமூகம் தங்களை இருகை நீட்டி அழைக்கும் அரவாணி ஜமாத்துகளில் சங்கமம் ஆகிறார்கள். ஆம், சமூக்தாலும், குடும்பத்தாலும் ஒதுக்கப்பட்ட இந்த அரவாணிகளை இத்தகைய ஜமாத்துக்கள் தான் அடைக்கலம் தந்து ஆதரிக்கின்றன. தங்களை பெண்மையுடன் அடையாளப்படுத்த மும்பை போன்ற நகரங்களில் அறுவை சிகிச்சை செய்து கவர்ச்சியான மார்பகங்களைப் பெற்று எங்கும் திருநங்கைகளாக நீக்கமற உலாவி வருகின்றனர். உழைத்து வாழ விரும்பாத பல அரவாணிகள் பாலியல் தொழிலில் ஈடுபட்டு பால்வினை, எய்ட்ஸ் போன்ற உயிர் கொல்லி நோய்களைப் பரப்புகிறார்கள். சிலர் திருட்டு, கொள்ளை போன்ற பாதகச் செயல்களைச் செய்யும் சமூக விரோதிகளாகவும் கைகளை தட்டி பிச்சை எடுக்கும் பிச்சைக்காரர்களாகவும் வாழ்கிறார்கள். (இரு கைகளை குவித்து இவர்கள் தட்டும் ஓசை மற்ற அரவாணிகளுக்கு ஓர் அடையாளமாக நமது மாநிலத்தில் உள்ள வழக்கமாக உள்ளது) ஆண்டிற்கொரு முறை நடக்கும் கூவகத்திருவிழா இவர்களது ஜமாத்துக்கு கிடைக்கும் அங்கீகாரமாகவே நினைக்கிறார்கள்.

7. புரையோடிய புனர் வாழ்வுத் திட்டங்கள் :
அரவாணிளுக்கு என்று தனிப்பட்ட தொண்டு நிறுவனங்கள் சில இயங்கினாலும் ஒரு புரிதலுடன் சரியான முயற்சிகள் மேற்கொள்ளப்படவில்லை. இவர்கள் சமூகக் கேடு நேரா வண்ணம் முன் எச்சரிக்கையாகப் பாலியல் நோய் வராமல் தடுக்கும் உறைகளை வழங்கும் பணிக்கு மட்டும் இவர்களைப் பயன்படுத்தும் பரிதாப நிலையே உள்ளது. இவர்களுக்கான புனர்வாழ்வு திட்டங்கள் சரிவர நிறைவேற்றப்படவில்லை. சமூகம் மட்டுமே அரவாணிகள் என கூறினாலும் சட்ட ரீதியாக மூன்றாம் பாலினமாகக் கருதி அரசின் அங்கீகாரம் தொடக்க நிலையிலேயே உள்ளது.

8. மாற வேண்டிய நமது பார்வை :
உயிருடன் ஊசலாடும் இந்த விளிம்பு நிலை மனிதர்களுக்கு ஒரு புனர்வாழ்வு தேவை. இவர்களை நாம் மனிதர்களாக, பார்க்க வேண்டும். இவர்களும் மனிதர்களே. இவர்களும் நம் குடும்ப சகோதரர்களே, இவர்களும் நமது பிள்ளைகளே. இவர்களுக்கும் ஓர் இதயம் உண்டு. அன்பை எதிர்நோக்கும் உணர்வு உண்டு என்ற ரீதியில் நமது பார்வை மாற வேண்டும். அவர்களையும் மனிதர்களாக மதிப்போம். தற்போது அரசு மேற்கொண்டுள்ள சில தொடக்க திட்டங்கள் அரவாணிகளின் நம்பிக்கைக்கு வகை புரிந்தாலும் அவர்களது புனர்வாழ்வுக்கு நமது சமூக ஆதரவும் அன்பான அரவணைப்பும் மட்டுமே வலுசேர்க்க முடியும். இவர்களுக்காக அண்மையில் தனிநபர் தீர்மானமாக திருச்சி சிவா எம்.பி. அவர்கள் மாநிலங்களவையில் கொண்டு வந்து நிறைவேற்றியது. உள்ளபடியே ஒரு விடியலுக்கான பாராட்ட வேண்டிய முயற்சி. காங்க் ராட்ஸ் சிவா.

9. அருட் பணியாளரும், பொது நிலையினரும் புரிதல்களில் மாற்றம் தேவை :
மீட்பர் இயேசு ஒடுக்கப்பட்டவர்களுக்கு உரிமை வாழ்வும், சிறைப்பட்டோருக்கு விடுதலையும், நற்செய்தியும் வழங்க விடுத்த அறைகூவல் இந்த அரவாணிகளுக்கும் பொருந்தும். நமது அருள்பணியாளர்கள், நற்செய்தியாளர்கள் தொண்டு நிறுவனங்களை நிர்வாகம் செய்யும் நமது திருஅவையினர் அனைவரும் இந்த அரவாணிகளை மனிதர்களாகப் புரிந்து செயல்பட வேண்டும். அரவாணிகளின் நல வாழ்வுக்கு தனிசட்டம் இயற்றவும் தனிகல்விக் கொள்கைகளை இயற்றி அவர்களைப் பற்றி ஒரு பகுப்பாய்வு செய்து வேலை வாய்ப்புகளை உருவாக்கவும் மாற்று மனநிலைக்கு அவர்களைக் கொணரவும் ஒரு மறுபரிசீலனை தேவையாக உள்ளது. இதற்கு நமது திருஅவையின் பங்கு முழுமையாகவும், ஒருதூண்டுதலாகவும் அமைய வேண்டும். நற்செய்தியில் திருத்தூதர் பணி 8 : 26 ‡ 40ல் எத்தியோப்பிய அரசி கந்தகியின் நிதியமைச்சர் ஒரு அலி. அவருக்கு இறைவனால் ஏவப்பட்ட பிலிப்பு இறைவார்த்தைகளை எடுத்துரைத்து திருமுழுக்கு கொடுத்து மனம் திரும்புதலுக்குஏற்புடையவர் ஆக்குகிறார். இச்செயல் அரவாணிகளும் மனம் திரும்புதலுக்கு ஏற்புடையவர்கள் என்பதை நமது திருஅவையும் உணர வேண்டும் என்பதே எனது தாழ்மையான கருத்து. அதே போல் எசாயா 56 : 3 ‡ 5ல் ஆண்டவரின் சித்தப்படி நடக்கும் அண்ணகர்களுக்கு இறைவன் தன் இல்லத்தில் ஒரு நினைவுச் சினனத்தை எழுப்புவதாகவும் புதல்வர் புதல்வியரை விடச் சிறந்தோர் பெயரை வழங்குவதாகவும் வாக்களிப்பதை வாசிக்கிறோம். இவர்களை இறைவனுடைய ஏற்புடைய மக்களாக மாற்றுவது யாருடைய பொறுப்பு? விளிம்பு நிலையிலுள்ள அவர்களது புனர்வாழ்வுக்கு நாம் என்ன செய்யப் போகிறோம்? நமது நற்செய்தியின் ஊடுருவல் அவர்கள் மத்தியில் இருக்க வேண்டாமா?

10. நமது  சிந்தனைக்கு :
பணம், பாசம், உறவு, மேன்மை என்ற கனவுகளுடன் போராடி தோற்றுப் போய் ஒரு பிடி மண்ணோடும் அல்லது சாம்பலோடும் கலந்து போவது மட்டும் மனித வாழ்க்கை அல்ல. நமது மனசாட்சி என்ற உரைக்கல்லை கொண்டு நம் வாழ்வை உரசிப்பார்த்து ஒரு சுய அலசல் செய்ய வேண்டியது நமது கடமை. இந்த விளிம்பு நிலையில் உள்ள அரவாணிகளும் மனிதர்களே. இவர்களையும் நாம் மனிதர்களாக மதிப்போம். இப்படித்தான் ஒரு சுயமரியாதை கிறிஸ்தவனின் சமூகப்பார்வை சமூக நீதியுடன் அமைய வேண்டும் என்பதை மனத்தாழ்மையுடன் கேடடுக்கொள்கிறேன்.


Ads Inside Post